मनाङ । मनाङको तिलिचो क्षेत्रमा पछिल्लो एक दिनमा हिउँको गहिराइ ४२ सेन्टिमिटरले बढेको छ। तिलिचो हिम मापन केन्द्रको तथ्याङ्कअनुसार कार्तिक १३ गते बिहान ८ः४५ बजेदेखि कार्तिक १४ गते बिहान ८ः४५ बजेसम्मको अवधिमा हिउँको औसत गहिराइ ०.९८७ मिटर पुगेको छ। शनिबार बिहान ७ बजे सबैभन्दा बढी १.३३ मिटर गहिराइ मापन भएको थियो। शनिबार बिहान ४ बजेयता हिउँको गहिराइ तीव्र गतिमा बढेको केन्द्रले जनाएको छ।
छोटो समयमा यति धेरै हिउँ थपिँदा भिरालो ठाउँमा हिमपहिरोको जोखिम बढेको छ। हिमपहिरोले खोलानाला थुनिएर अस्थायी ताल बन्न सक्ने र त्यस्तो ताल फुटेमा तल्लो क्षेत्रमा आकस्मिक बाढी आउन सक्ने खतरा रहेको विज्ञहरूले बताएका छन्।
थपिएको हिउँ पानीको ठूलो भण्डार हो, जुन मर्स्याङ्दी नदीको प्रवाहसँग जोडिएको छ। तापक्रम अचानक बढेमा वा हिउँमाथि वर्षा भएमा यो हिउँ छिटो पग्लिएर मर्स्याङ्दी र त्यसका सहायक खोलाहरूको बहाव बढाउन सक्छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सावधानी अपनाउन आग्रह गरेको छ। तिलिचो ताल र मनाङ क्षेत्रमा जाने पर्यटक तथा पथप्रदर्शकलाई यात्राअघि आधिकारिक पूर्वानुमान हेरेर मात्र हिँड्न भनिएको छ। हिमपहिरोको जोखिम भएको भिरालो ठाउँ र खोलाको किनारमा नबस्न पनि आग्रह गरिएको छ। मर्स्याङ्दी किनारका बासिन्दालाई नदीको बहावमा अस्वाभाविक परिवर्तन देखिएमा तुरुन्त स्थानीय प्रशासनलाई खबर गर्न र बाढीको पूर्वसूचनाका लागि जलविज्ञान तथा जलस्रोत अनुसन्धान केन्द्रको आधिकारिक सूचना निरन्तर हेर्न अनुरोध गरिएको छ।
