शुक्रबार साँझदेखि शनिबार बिहानसम्म देशका विभिन्न ठाउँमा भएका सवारी दुर्घटनामा सात जनाको ज्यान गएको छ। दैलेख, सल्यान, मकवानपुर र झापामा भएका छुट्टाछुट्टै दुर्घटनामा उनीहरूको मृत्यु भएको हो। केही घाइतेको विभिन्न अस्पतालमा उपचार भइरहेको छ।
दैलेखको डुङ्गेश्वर गाउँपालिका–१, चुप्रामा चुप्राबाट देउली बजारतर्फ गइरहेको पिकअपले ठक्कर दिँदा पैदलयात्री २९ वर्षीय जुठे विकको शुक्रबार साँझ मृत्यु भयो। जिल्ला अस्पताल दैलेखमा उपचारका क्रममा उनको ज्यान गएको हो। पिकअप चालकलाई प्रहरीले नियन्त्रणमा लिएको छ।
सल्यानको सिद्ध कुमाख गाउँपालिका–२, रातामाटे खोलामा श्रीनगरबाट टाकुरा गाउँतर्फ जाँदै गरेको जिप सडकबाट करिब एक सय ५० मिटर तल खस्दा शुक्रबार बेलुकी तीन जनाको मृत्यु भयो। मृत्यु हुनेमा ४२ वर्षीया कृष्णी बस्नेत, ४५ वर्षीया सिता विक र ४३ वर्षीय साउने रोका छन्। जिल्ला अस्पताल सल्यानमा उपचारका क्रममा उनीहरूको ज्यान गएको हो। जिपमा सवार अन्य तीन घाइतेको नेपालगञ्ज र श्रीनगरका अस्पतालमा उपचार भइरहेको छ। जिप चालकलाई प्रहरीले नियन्त्रणमा लिएको छ।
सल्यानकै बनगाड कुपिण्डे नगरपालिका–११, गरामा चौरबाट बालुवा सङ्ग्राहीतर्फ आउँदै गरेको बोलेरो सडकबाट करिब एक सय मिटर तल खस्दा २५ वर्षीय पप्पु डाँगीको मृत्यु भयो। दुर्घटनामा गम्भीर घाइते भएका उनको मेहेलकुना अस्पताल सुर्खेतमा उपचारका क्रममा शनिबार बिहान ज्यान गएको हो। बोलेरोमा सवार अन्य सात घाइतेको नेपालगञ्ज र सुर्खेतका अस्पतालमा उपचार भइरहेको छ।
मकवानपुरको बकैया गाउँपालिका–५, तिनतल्ले फास्ट्याकमा हेटौँडाबाट हात्तीसुडेतर्फ आउँदै गरेको ट्याङ्कर अनियन्त्रित भई शुक्रबार बेलुकी दुर्घटना हुँदा चालक ४० वर्षीय रमेशकुमार रायमाझीको घटनास्थलमै मृत्यु भयो।
झापाको कमल गाउँपालिका–५, साबित्रा चोकमा मोटरसाइकल र ट्रक एकआपसमा ठोक्किँदा मोटरसाइकल चालक १९ वर्षीय सागर तिमल्सिनाको मृत्यु भयो। कन्काई नगर अस्पताल सुरूङ्गामा उपचारका क्रममा उनको ज्यान गएको हो। ट्रक चालकलाई प्रहरीले नियन्त्रणमा लिएको छ। सबै दुर्घटनाबारे प्रहरीले अनुसन्धान गरिरहेको छ।
