बाराको फेटा गाउँपालिकामा स्वास्थ्य चौकी उद्घाटनको विषयलाई लिएर भएको विवादमा प्रहरीले गोली चलाएको छ। प्रहरीको गोली लागेर एक जना घाइते भएका छन्।
शनिबार बिहान गाउँपालिका अध्यक्षसहितको टोलीले गाउँमा स्वास्थ्य चौकी उद्घाटन गर्ने कार्यक्रम राखेको थियो। विपक्षी समूहले त्यसमा रोक लगाएपछि विवाद सुरु भएको हो। विवाद चर्किँदै गएपछि दुई समूहबिच झडप हुन थाल्यो।
झडप नियन्त्रण गर्न प्रहरीले लाठी चार्ज गर्यो। त्यस क्रममा प्रहरीमाथि ढुंगामुढा प्रहार हुन थालेपछि जवाफी कारबाहीमा प्रहरीले गोली चलाएको मधेस प्रहरीले जनाएको छ। मधेस प्रहरी प्रमुख डिआइजी ओम प्रसाद अधिकारीका अनुसार भीड नियन्त्रणभन्दा बाहिर गएपछि प्रहरीले हवाई फायर मात्र गरेको थियो। तर त्यहाँ एक जना गोली लागेर घाइतेसमेत भएको उनको भनाइ छ।
कसको गोलीबाट ती युवक घाइते भएको खुल्न नसकेको प्रहरीले जानकारी दिएको छ। फेटा गाउँपालिका वडा नम्बर ३ स्थित स्वास्थ्य चौकीको उद्घाटन गर्न खोज्दा विवाद भएको थियो। विवाद नेपाल राष्ट्रिय माध्यमिक विद्यालय नजिकै भएको हो।
गोली लागेर घाइते भएका युवकको वीरगन्जस्थित नेशनल मेडिकल कलेजमा उपचार भइरहेको छ। घाइते युवकको पहिचान भने अहिले खुल्न नसकेको मधेस प्रहरीले बताउँछ।
