नाइजेरियाली सेनाले देशको उत्तरपूर्वी क्षेत्रमा रहेका दुई सैन्य अखडामा सशस्त्र समूहले गरेको आक्रमण विफल पारेको छ। त्यसक्रममा इस्लामिक स्टेट वेस्ट अफ्रिका प्रोभिन्स (आईएसडब्ल्यूएपी) का ४८ जना संदिग्ध लडाकु मारिएको सेनाले दाबी गरेको छ।
सेनाका अनुसार उत्तरपूर्वी बोर्नो र योबे राज्यमा रहेका सैन्य अखडालाई लक्षित गरी बिहीबार राति र शुक्रबार बिहान आक्रमण भएको थियो। दुवै आक्रमणलाई सेनाले जवाफी कारबाहीमार्फत विफल पारेको जनाएको छ।
‘अपरेसन हादिन काई’ अन्तर्गत सञ्चालित संयुक्त कार्यदलका प्रवक्ता मोहम्मद गोनीले शुक्रबार जारी गरेको विज्ञप्तिमा बोर्नो राज्यको ग्वाजा स्थानीय सरकारी क्षेत्रअन्तर्गत बिट्टा र योबे राज्यको बुनी यादीस्थित सैन्य अखडामा आक्रमण भएको उल्लेख छ।
गोनीका अनुसार बोर्नोको बिट्टामा भएको आक्रमणलाई सेनाले हवाई सहयोगसहितको कारबाहीमार्फत नियन्त्रणमा लिएको थियो। बुनी यादीमा बिहीबार रातिदेखि शुक्रबार बिहानसम्म भएको आक्रमणको जवाफमा पनि सेनाले कारबाही गरेको थियो।
कारबाहीका क्रममा एक सैनिकको मृत्यु भएको र दुई जना घाइते भएको सेनाले जनाएको छ। लडाकुबाट ५२ थान हतियार बरामद गरिएको विज्ञप्तिमा उल्लेख छ।
नाइजेरियाली सेनाले सशस्त्र समूहको गतिविधि र आक्रमण गर्ने क्षमता कमजोर पार्न सुरक्षा कारबाहीलाई निरन्तरता दिने जनाएको छ। समूहको सदस्य भर्ती, प्रचारप्रसार तथा आक्रमणको समन्वय गर्ने क्षमतामा समेत अङ्कुश लगाउने सेनाको भनाइ छ।
आईएसडब्ल्यूएपी उत्तरपूर्वी नाइजेरियामा सक्रिय सशस्त्र समूह हो। बोको हरामसँगै यस समूहले नाइजेरियामा हिंसात्मक गतिविधि गर्दै आएको छ। यी समूहले लेक चाड क्षेत्रका अन्य देशमा समेत आक्रमण गर्दै आएका छन्।
