सङ्खुवासभामा जारी गोल्डकप फुटबल प्रतियोगितामा आयोजक जिल्लाका दुई टोलीले सेमिफाइनलमा स्थान बनाएका छन्। लोहरुङ क्लब पाङ्मा र सेकाहा सामुदायिक क्लबले मंगलबारका खेल जित्दै अन्तिम चारको यात्रा तय गरेका हुन्।
खाँदबारी नगरपालिका–३, मानेभञ्याङस्थित महेन्द्र माध्यमिक विद्यालयको मैदानमा भएको पहिलो खेल निकै रोमाञ्चक बन्यो। लोहरुङ र सिरहाको सलहेश युवा क्लबबीच निर्धारित समय २–२ को बराबरीमा सकियो। त्यसपछि टाइब्रेकरमा पनि दुवैले चार–चार गोल गरेपछि खेलको टुङ्गो सडन डेथबाट लाग्यो, जहाँ लोहरुङले ६–५ ले बाजी मार्यो। खेलको सुरुआतमा सलहेशले अग्रता लिए पनि लोहरुङले हार मानेन र अन्ततः जित आफ्नो पक्षमा पार्यो।
दिनको अर्को खेलमा सेकाहा सामुदायिक क्लबले झापा–११ लाई २–० ले हरायो। सेकाहाका मिलन लिम्बूले खेलको ५५औँ र ६३औँ मिनेटमा दुई गोल गर्दै टोलीको जित पक्का गरे। दोस्रो हाफमा उत्कृष्ट खेलेको सेकाहाले विपक्षीलाई गोलको अवसर नै दिएन।
आठ टोली सहभागी प्रतियोगिता यही कात्तिक २० गतेसम्म चल्नेछ। प्रतियोगिता संयोजक जिल्लामान राईका अनुसार विजेताले पाँच लाख र उपविजेताले तीन लाख रुपैयाँ पाउनेछन्। उत्कृष्ट गोलरक्षक, मिडफिल्डर, डिफेन्डर, फरवार्ड र सर्वाधिक गोलकर्तालाई जनही सात हजार रुपैयाँ दिइनेछ भने प्रत्येक खेलका उत्कृष्ट खेलाडीले पाँच हजार र प्रतियोगिताकै सर्वोत्कृष्ट खेलाडीले १० हजार रुपैयाँ पाउनेछन्। प्रतियोगिता एडभान्स क्लब मानेभञ्याङको आयोजनामा सोमबारदेखि सुरु भएको हो।
