आर्थिक वर्ष २०८३/८४ को पहिलो त्रैमासिकमा जलस्रोत तथा सिँचाइ विभागले २ अर्ब ३९ करोड ३० लाख रुपैयाँ खर्च गरेको छ। विभागको कुल खर्चमध्ये ८८ प्रतिशत पुँजीगत अर्थात् निर्माण कार्यमा खर्च भएको छ।
विभागका महानिर्देशक दिनेश रजौरियाले पहिलो त्रैमासिकमा सिँचाइ आयोजनाहरूको प्रगति राम्रो देखिएको बताए। महाकाली सिँचाइ आयोजना (कञ्चनपुर) ले त्रैमासिक भौतिक लक्ष्यको ९७.२ प्रतिशत प्रगति गरेको छ। उक्त आयोजनामा ४३ करोड ७० लाख रुपैयाँ खर्च भएको छ, जुन त्रैमासिक बजेटको अढाई गुणाभन्दा बढी हो।
त्यस्तै त्रैमासिक लक्ष्यको तुलनामा बबई सिँचाइ आयोजनाले ८१.८ प्रतिशत, सिक्टा सिँचाइ आयोजनाले ८०.२ प्रतिशत र रानी जमरा कुलरिया सिँचाइ आयोजनाले ७१ प्रतिशत भौतिक प्रगति गरेका छन्।
महानिर्देशक रजौरियाका अनुसार यी चार ठूला आयोजनामा मात्रै १३९ करोड रुपैयाँ खर्च भएको छ। यो विभागको कुल खर्चको ५८ प्रतिशत हो।
विभागका अनुसार प्रगन्ना–बड्कापथ आयोजना (दाङ) ले ८८.२ प्रतिशत प्रगति गरेको छ। त्यस्तै गहिरो ट्युबवेल सिँचाइ आयोजना र सिँचाइ संस्थागत विकास कार्यक्रमले शतप्रतिशत लक्ष्य हासिल गरेका छन्।
महानिर्देशक रजौरियाले तयारी पूरा भएका आयोजनामा बजेट र काम दुवै अघि बढेको बताए। दोस्रो त्रैमासिकमा ढिलो सुरु भएका आयोजनालाई पनि यही गतिमा अघि बढाउनु विभागको प्राथमिकता रहेको उनको भनाइ छ।
