अर्थमन्त्री स्वर्णिम वाग्लेले चालु आर्थिक वर्षमा विदेशी अनुदान प्राप्त गर्न निकै कठिन अवस्था रहेको बताएका छन्। रसुवा बाढीले पुर्याएको क्षति तथा राहत उद्धारको सम्बन्धमा गठित संसदीय विशेष समितिको बैठकमा उनले यस वर्ष सात–आठ अर्ब रुपैयाँ अनुदान आउन पनि गाह्रो रहेको बताए।
अर्थमन्त्रीले सरकारले एक दिनमा उठाउने राजस्वभन्दा विदेशीले वर्षभरि दिने अनुदान कम हुन थालेको बताए। उनले अब सहुलियतपूर्ण ऋणको विकल्प नभएको पनि स्पष्ट पारे।
सरकारले चालु आर्थिक वर्षका लागि ६१ अर्ब ७४ करोड रुपैयाँ बराबरको अनुदान सहयोग प्राप्त गर्ने अनुमान गरेको थियो। बजेट आएको पाँच महिनापछि अर्थमन्त्रीले अनुमानित रकमको १० प्रतिशत हाराहारीमा मात्रै अनुदान आउने प्रक्षेपण गरेका छन्।
अनुदानमा आएको यो गिरावटले सरकारको खर्च व्यवस्थापन र विकास आयोजनामा थप दबाब पर्ने देखिएको छ।
