सर्वोच्च अदालतमा प्रस्तावित न्यायाधीश जनक पाण्डेविरुद्ध संसदीय सुनुवाइ समितिमा उजुरी दिएका उजुरीकर्ता सुवास ढकालमाथि समितिका सदस्यहरूले एकपछि अर्को प्रश्न गरेका छन्। शुक्रबार भएको छलफलमा सदस्यहरूले उजुरी र त्यसमा ढकालले दिएका तर्कमाथि प्रतिप्रश्न गरेका हुन्।
समिति सदस्य वर्षमान पुनले नेपालको कानुन अनुसार श्रीमतीले पाकेटमारी गर्दा श्रीमान् जेल जानुपर्ने अवस्था नरहेको बताए। उनले जसले पाकेट मारेको हो, उही जेल जानुपर्ने कानुन रहेको भन्दै पाण्डेको विषयमा थप प्रस्ट पार्न आग्रह गरे।
अर्का सदस्य अर्जुननरसिंह केसीले श्रीमान्–श्रीमती भएपछि सम्पत्तिमा पनि अधिकार रहने भन्ने ढकालको तर्कमाथि प्रतिप्रश्न गरे। उनले जग्गा दर्ता हुँदा उहाँ पुरी हुँदा भयो वा पाण्डे हुँदा भयो भन्ने प्रश्न गर्दै दोषी पाण्डे हो वा पुरी हो भन्ने कुरा प्रस्ट हुनुपर्ने बताए।
समिति सदस्य पद्मा कुमारी अर्यालले ढकालले न्यायाधीश पाण्डेमाथि उठाएको प्रश्न नैतिक प्रश्न भएको बताइन्। उनले अरूको जग्गा फिर्ता हुने तर जनकको नहुनुमा कहाँ कस्तो भूमिका रह्यो र त्यहाँ पहुँच कसरी प्रयोग भयो भन्ने प्रस्ट पार्न आग्रह गरिन्। जवाफमा ढकालले जग्गा सरकारीकरण भइसके पनि व्यक्तिले सजाय नपाएको विषयमा अदालतले बोल्नुपर्ने बताए। उनले जग्गा प्राप्त गरेको माया पुरी पाण्डे भएपछि हो भन्ने दाबी गरे।
