अस्ट्रेलियाको सबैभन्दा ठूलो सहर सिड्नीमा आइतबार आप्रवासनको विषयले दुई फरक समूहलाई सडकमा उत्रन बाध्य बनायो। एकातिर आप्रवासनमा कडाइको माग गर्दै ‘अस्ट्रेलिया मार्चेस’ अभियानका समर्थकहरूले जुलुस निकाले भने अर्कोतिर बहुसांस्कृतिक समाजको पक्षमा उभिएका समूहहरूले त्यसको प्रतिवाद गरे।
वर्षा भइरहेकै बेला सुरु भएको जुलुस रोयल बोटानिक गार्डेन क्षेत्रबाट म्याक्वेरी स्ट्रिट र हाइड पार्क हुँदै न्यु साउथ वेल्सको संसद् भवनसम्म पुग्यो। सहभागीहरूले नयाँ आप्रवासीको आगमन नियन्त्रण गर्नुपर्ने र राष्ट्रिय हितलाई पहिलो प्राथमिकता दिनुपर्ने माग अघि सारेका थिए। जुलुसमा आप्रवासन नीतिका आलोचक तथा राष्ट्रवादी सोच राख्ने समूहहरू सहभागी थिए।
त्यसको जवाफमा सिड्नी टाउन हल क्षेत्रमा शरणार्थी र आप्रवासीका अधिकारका पक्षधरहरूले छुट्टै भेला गरे। उनीहरूले जातीय विभेद र आप्रवासीविरोधी गतिविधिको विरोध गर्दै अस्ट्रेलियाको बहुसांस्कृतिक पहिचान र सामाजिक विविधता जोगाउनुपर्ने आवाज उठाए।
पछिल्ला वर्षहरूमा अस्ट्रेलियामा जनसङ्ख्या वृद्धि, आवासको अभाव र सार्वजनिक पूर्वाधारमाथि परेको चापलाई लिएर आप्रवासन व्यवस्थापनबारे बहस तीव्र बन्दै गएको छ। एकातिर स्वास्थ्य, शिक्षा, कृषि र निर्माण क्षेत्रमा आप्रवासी समुदायको योगदानको चर्चा हुन्छ भने अर्कोतिर स्रोत र पूर्वाधारमाथिको दबाब देखाउँदै नीतिमा कडाइ गर्नुपर्ने माग पनि उठिरहेको छ।
सिड्नीमा बस्दै आएका नेपाली मूलका आप्रवासी राजीव भुसालले अवसर र आश्रय दिएको देशप्रति आप्रवासीहरूले सम्मान देखाउनुपर्ने बताए। ‘कुनै देशले अवसर र राम्रो भविष्य दिएको छ भने त्यसको सम्मान गर्दै समाजमा सकारात्मक योगदान पुर्याउनुपर्छ,’ उनले भने, ‘पुस्तौँको मिहिनेतबाट निर्माण भएको समाजलाई कमजोर बनाउने वा अपमान गर्ने व्यवहार स्वीकार्य हुँदैन।’
