सोमबार सुनको भाउ फेरि उकालो लागेको छ। नेपाल सुनचाँदी व्यवसायी महासंघले सोमबारका लागि सुनको मूल्य तोलामा २ हजार ३ सय रुपैयाँले बढाएर २ लाख ७४ हजार ३ सय रुपैयाँ कायम गरेको छ।
आइतबार सुनको मूल्य एकैदिन ८ हजार ३ सय रुपैयाँले घटेको थियो। आइतबार प्रतितोला २ लाख ७२ हजार रुपैयाँमा कारोबार भएको सुन सोमबार फेरि महँगिएको हो। पछिल्ला दिनमा सुनको मूल्यमा देखिएको उतारचढावले उपभोक्ता र व्यवसायी दुवैलाई अन्योलमा पारेको छ।
सुनसँगै चाँदीको मूल्य पनि बढेको छ। सोमबार चाँदी प्रतितोला ७० रुपैयाँले महँगिएर ३ हजार ७२० रुपैयाँ पुगेको छ। आइतबार चाँदी ३ हजार ६५० रुपैयाँमा कारोबार भएको थियो।
अन्तर्राष्ट्रिय बजारमा हुने मूल्यको उतारचढाव, डलरको भाउ र लगानीकर्ताको मागले नेपाली बजारको सुनचाँदीको मूल्य निर्धारणमा प्रत्यक्ष असर पार्ने गर्छ। पछिल्लो समय सुनको मूल्य उच्च बिन्दुमा पुगेका कारण गरगहना किन्नेहरू थप खर्चको मारमा परेका छन् भने लगानीकर्ताले भने सुनलाई सुरक्षित सम्पत्तिका रूपमा हेर्ने गरेका छन्।
