खगोलशास्त्रीहरूले हाम्रो सौर्यमण्डल बाहिर सम्भवतः पहिलो चन्द्रमा फेला पारेको दाबी गरेका छन्। तर यो पिण्ड हामीले चिनेका चन्द्रमाभन्दा निकै फरक छ, किनकि यसले कुनै ग्रहलाई होइन, एउटा ब्राउन ड्वार्फलाई परिक्रमा गरिरहेको छ। पुष्टि भएमा यो खोज सौर्यमण्डल बाहिर प्राकृतिक उपग्रहको पहिलो आविष्कार हुनेछ।
युरोपेली साउदर्न अब्जर्भेटरीको भेरी लार्जर टेलिस्कोपबाट गरिएको अवलोकनले सीडी–३५ २७२२ तारा प्रणालीमा यो विशाल पिण्ड रहेको प्रमाण भेटिएको हो। उक्त प्रणालीको केन्द्रमा सूर्यको करिब आधा द्रव्यमान भएको तारा छ। त्यस तारालाई एउटा ब्राउन ड्वार्फले परिक्रमा गर्छ भने नयाँ पिण्डले त्यही ब्राउन ड्वार्फको चक्कर लगाउँछ।
नयाँ पिण्डको द्रव्यमान कम्तीमा बृहस्पति ग्रह जति छ भने यसले परिक्रमा गर्ने ब्राउन ड्वार्फको द्रव्यमान बृहस्पतिभन्दा ३० गुणा बढी छ। त्यसैले यो हाम्रो सौर्यमण्डलको कुनै पनि प्राकृतिक उपग्रहभन्दा धेरै विशाल छ। अनुसन्धानकर्ताहरूले यसलाई एक्सोस्याटेलाइट नाम दिएका छन्।
नेचर पत्रिकामा प्रकाशित अध्ययनका मुख्य लेखक केभिन होयका अनुसार सौर्यमण्डलमा आधारित ग्रह र चन्द्रमा जस्ता शब्दले यो प्रणालीलाई परिभाषित गर्न कठिन छ। अध्ययनका सहकर्मी एलिस जुरलोले यो प्रणालीलाई साँच्चिकै अद्वितीय बताएकी छन्।
टोलीले रेडियल भेलोसिटी प्रविधि प्रयोग गरेको थियो, जसले कुनै पिण्डको गतिमा आउने अत्यन्त साना परिवर्तन मापन गर्छ। ब्राउन ड्वार्फको गतिमा देखिएको सूक्ष्म हलचलबाट अर्को विशाल पिण्डले त्यसलाई परिक्रमा गरिरहेको बलियो प्रमाण भेटिएको हो। अवलोकनमा टेलिस्कोपमा जडान गरिएको क्रायर्स प्लस उपकरण प्रयोग गरिएको थियो।
वैज्ञानिकहरूले वर्षौँदेखि सौर्यमण्डल बाहिर चन्द्रमाको खोजी गरिरहेका छन्। हालसम्म छ हजारभन्दा बढी एक्सोप्ल्यानेट पहिचान भए पनि सम्भावित एक्सोमुन थोरै मात्र भेटिएका छन्। सन् २०२६ को सुरुमा एचडी २०६८९३ प्रणालीमा देखिएको संकेत ठोस प्रमाणमा बदलिन सकेको थिएन। आगामी एक्सट्रीमली लार्जर टेलिस्कोपले यस्ता साना उपग्रह पत्ता लगाउन थप सहयोग गर्ने अपेक्षा गरिएको छ।
