नेपाली कांग्रेसका नेता नैनसिंह महरले न्यायपालिकाको स्वतन्त्रतामाथि कुनै पनि किसिमको हस्तक्षेप स्वीकार गर्न नसकिने बताएका छन्। मंगलबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले राज्यका प्रमुख संस्थाहरूको विश्वसनीयता जोगाउनु सबैको साझा दायित्व भएको उल्लेख गरे।
पछिल्ला दिनमा विशेष किसिमको मिलेमतोका कारण न्यायपालिकासहित राज्यका महत्वपूर्ण संस्थाहरू विवादमा परेको भन्ने समाचार सार्वजनिक भएको उनले बताए। यस्ता विषयले गम्भीर प्रश्न उठाएको र त्यसको निष्पक्ष छानबिन हुनुपर्ने उनको माग छ। छानबिनबाट दोषी देखिएकालाई कानुनअनुसार कारबाही गर्नुपर्ने उनले जोड दिए।
कांग्रेस कानुनी राज्य र विधिको शासनमा विश्वास गर्ने दल भएको स्मरण गराउँदै महरले न्यायपालिकाको स्वतन्त्रता लोकतन्त्रको मुख्य आधार भएको बताए। कुनै व्यक्ति वा समूहको स्वार्थ पूरा गर्न सिंगो न्यायपालिकालाई बदनाम गर्ने प्रयासले राज्यलाई कमजोर बनाउने उनको भनाइ छ। यस्तो चलखेलले अराजकता र षड्यन्त्रलाई मात्र बल पुग्ने उनले चेतावनी दिए।
न्यायपालिकाको स्वतन्त्रताको नाममा संस्थाभित्र उठेका गम्भीर प्रश्नलाई बेवास्ता गर्न नहुने उनको तर्क छ। बाहिर आएका विषयको स्वतन्त्र छानबिन गरी सत्यतथ्य सार्वजनिक गर्नुपर्ने महरको भनाइ छ।
बलियो राज्य निर्माणका लागि शक्तिशाली सरकार मात्र पर्याप्त नहुने उनले बताए। सरकार बदलिइरहने राजनीतिक व्यवस्थामा राज्यका स्थायी संस्थाहरू स्वतन्त्र, सक्षम र जवाफदेही हुनुपर्ने उनको तर्क छ। राष्ट्रको सामर्थ्य संस्थाहरूको क्षमता, आर्थिक उन्नति र नागरिकको सबलतामा निर्भर रहने उनले बताए। राजनीतिक स्थिरता, संस्थागत क्षमता, आर्थिक समृद्धि र नागरिकको विश्वास एकअर्काका परिपूरक रहेको महरको भनाइ छ।
