पर्सा जिल्लामा भन्सार नतिरी नेपाल भित्र्याइएका दुईवटा निजी सवारीसाधन प्रहरीले नियन्त्रणमा लिएको छ। लामो समयदेखि यस्ता सवारीसाधन जिल्लाका ग्रामीण तथा बजार क्षेत्रमा सञ्चालन भइरहेको सूचना पाएपछि जिल्ला प्रहरी कार्यालयले कारबाही अघि बढाएको हो।
वीरगन्ज महानगरपालिका–१६ को इनर्वागाउँस्थित सडकखण्डमा बेवारिसे अवस्थामा भेटिएका भारतीय बोलेरो गाडी र मारुती सुजुकी कार प्रहरीले नियन्त्रणमा लिएको हो। दुवै सवारीसाधनको मूल्याङ्कन २२ लाख रुपैयाँ गरिएको छ।
थप अनुसन्धान तथा आवश्यक कारबाहीका लागि ती सवारीसाधन वीरगन्ज भन्सार कार्यालयमा दाखिला गरिएको जिल्ला प्रहरी कार्यालयका प्रहरी नायब उपरीक्षक चक्रबहादुर मल्लले जानकारी दिए। भन्सार कार्यालयले अब सवारीसाधन भित्र्याउने प्रक्रियाबारे छानबिन गर्ने र नियमानुसार कारबाही अघि बढाउने छ।
भन्सार छलेर सवारीसाधन भित्र्याउने कार्यविरुद्ध प्रहरीले निगरानी बढाएको छ। सीमा क्षेत्रबाट अवैध रूपमा भित्रिने सवारीसाधनमाथि कडाइ गर्ने र यस्ता गतिविधिमा संलग्नमाथि कानुनी कारबाही गर्ने प्रहरीको भनाइ छ।
