बाँकेको नेपालगन्जमा कृषि विषयमा स्नातक गर्दै गरेका तीन जना विद्यार्थीले सानो जग्गामा सुरु गरेको फूलखेतीले राम्रो आम्दानी दिन थालेको छ। नेपालगन्ज उपमहानगरपालिका–१९ को फुटाहामा उनीहरूले १० कट्ठा जग्गामा फूल रोपेर परीक्षणका रूपमा व्यवसाय थालेका हुन्।
वेदराज आर्चाय, असिम सिग्देल र चेतन केसीले ‘फिट फार्म’ नामक समूह बनाएर यो काम सुरु गरेका हुन्। उनीहरूले गत साउनमा चितवनबाट बीउ ल्याएर पानी नजम्ने ठाउँ छानेर खेती थालेका थिए। तिहारअघि नै करिब ५० हजार रुपैयाँ बराबरको फूल बिक्री भइसकेको छ भने अग्रिम बुकिङ पनि भइरहेको छ।
तिहारमा फूलको माग बढ्ने भएकाले उनीहरूको उत्पादनमा चासो बढेको छ। बुटवल, दाङ, काठमाडौँ र सुर्खेतबाट पनि माग आएको छ, तर उनीहरूले स्थानीय ग्राहकलाई प्राथमिकता दिएका छन्। फूलको बजारीकरण सामाजिक सञ्जालबाटै भएको छ र तिहारमा नेपालगन्जको धम्बोझीमा खुद्रा बिक्री गर्ने योजना छ।
आर्चायका अनुसार सानो लगानी र थोरै मेहनतले पनि फूलखेतीबाट राम्रो प्रतिफल पाउन सकिन्छ। उनले पानीको व्यवस्थापन र वर्षायाममा रोग तथा किराको नियन्त्रणमा ध्यान दिएको बताए। फूलसँगै आगामी दिनमा तरबुजा र स्ट्रबेरीखेती गर्ने योजना पनि रहेको उनले जानकारी दिए।
यसैबीच, लुम्बिनी फ्लोरिकल्चर एसोसियसनका पूर्वसदस्य तथा महिला उद्यमी सङ्घ बाँकेकी महासचिव बिन्दु छन्त्याल मगरले जिल्लामा करिब १३ बिगाहामा फूलखेती भइरहेको बताइन्। उनले सयपत्री, कलकत्ते र आगा ३५५ जातका फूल खेती भइरहेको उल्लेख गर्दै भारतीय फूलको आयात रोक्न र बजारीकरणका लागि स्थानीय तहले नीति बनाउनुपर्ने धारणा राखिन्। बाँकेको नरैनापुर, खजुरा, नेपालगन्ज र कोहलपुरमा फूलखेती भइरहेको छ।
