बुधबार धितोपत्र बजारमा नेप्से परिसूचक सामान्य सुधारसहित २६६५ अंकमा पुगेको छ। अघिल्लो कारोबार दिन ६.६२ अंकले उक्लिएको बजार आज भने १.४० अंक मात्र बढ्यो। अंकको वृद्धिदर सानो रहे पनि कारोबार रकम भने उल्लेख्य रूपमा बढेको छ। अघिल्लो दिन ५ अर्ब ६५ करोड रुपैयाँको कारोबार भएकोमा बुधबार ७ अर्ब ४३ करोड रुपैयाँ बराबरको सेयर किनबेच भयो। आज कारोबारमा आएका कम्पनीमध्ये ९८ वटाको मूल्य बढ्यो भने १७१ वटाको घट्यो। नौ कम्पनीको मूल्य स्थिर रह्यो।
बजारको आकर्षणको केन्द्रमा दुई पुनर्बीमा कम्पनी रहे। मन्त्रिपरिषद्ले नेपाल पुनर्बीमालाई हकप्रद सेयर जारी गर्न अनुमति दिएपछि कम्पनीको सेयर मूल्य एकै दिन १५ प्रतिशतले उक्लियो। हिमालयन रिइन्स्योरेन्सले पनि हकप्रदमार्फत पूँजी बढाउने निश्चित भएपछि त्यसको मूल्य ११.४८ प्रतिशत बढ्यो। यी दुई कम्पनीकै कारण अन्य समूहको सूचक ६.१८ प्रतिशतले माथि गयो।
व्यापार समूह १.११ प्रतिशत र जीवन बीमा समूह ०.१० प्रतिशतले बढे। बाँकी सबै समूह ओरालो लागे—बैंकिङ ०.८२, विकास बैंक ०.४४, फाइनान्स ०.८२, होटल तथा पर्यटन ०.७४, जलविद्युत् ०.६८, लगानी ०.४५, उत्पादन तथा प्रशोधन ०.२८, माइक्रोफाइनान्स ०.२० र निर्जीवन बीमा ०.१३ प्रतिशतले घटे।
दुई पुनर्बीमाबाहेक स्वेतगंगा हाइड्रोपावरको मूल्य ८.६५, घोराही सिमेन्टको ५, नेपाल रिपब्लिक मिडियाको ४.९७ र मन्दाकिनी हाइड्रोको ४.४२ प्रतिशतले बढ्यो। शिखर पावर ३.७४, सीवाईसी लघुवित्त ३.३४, चिरख्वा हाइड्रोपावर ३.२६ र जनउत्थान सामुदायिक लघुवित्त ३.२० प्रतिशतले घटे। धेरै कारोबार भएका कम्पनीमा स्वेतगंगा हाइड्रोपावर, घोराही सिमेन्ट, हिमालयन रिइन्स्योरेन्स, एनआईसी एसिया बैंक, शिवम् सिमेन्ट र ग्लोबल आईएमई बैंक अगाडि रहे।
