एसियाली खेलकुदमा रजत पदक जितेकी नेपाली कराते खेलाडी एरिका गुरुङको खेल जीवनलाई बलियो बनाउन अस्ट्रेलियामा बसोबास गर्ने नेपाली समुदायले करिब तीन लाख रुपैयाँ जुटाएको छ। सिड्नीमा रहेको यात्रा रन क्लबको अगुवाइमा चलाइएको सहयोग अभियानबाट उक्त रकम संकलन भएको हो।
अभियानका क्रममा गत सेप्टेम्बर २० मा सिड्नीमा विशेष दौड आयोजना गरिएको थियो। दौडमा दुई सय ५० भन्दा बढी धावक प्रत्यक्ष रूपमा सहभागी भएका थिए भने समर्थक र शुभेच्छुकसहित पाँच सयभन्दा बढी मानिस उपस्थित थिए।
गोफन्डमीमार्फत उठेको रकम कुनै संस्था वा बिचौलियामार्फत नभई सिधै एरिकाको खातामा पुगिसकेको आयोजकले जनाएको छ। प्राप्त रकम उनको नियमित प्रशिक्षणसँगै शारीरिक क्षमता विकास, फिजियोथेरापी, चोटपटक रोकथाम र पुनर्स्थापनामा खर्च गरिनेछ। आगामी राष्ट्रिय तथा अन्तर्राष्ट्रिय प्रतियोगिताको तयारीमा पनि यसले सहयोग पुग्ने अपेक्षा छ।
अभियानको संयोजन पूर्व राष्ट्रिय ट्रायथलन खेलाडी नितेश मानन्धरले गरेका थिए भने नेपालतर्फ राष्ट्रिय खेलकुद परिषद्की कार्यकारी बोर्ड सदस्य सिक्का सुवाल श्रेष्ठले समन्वयमा सघाएकी थिइन्। आयोजकहरूले आवश्यक परेमा भविष्यमा अन्य नेपाली खेलाडीलाई पनि यस्तै सहयोग गर्ने प्रतिबद्धता जनाएका छन्। विदेशमा रहेका नेपाली समुदायलाई स्वदेशका खेलाडीसँग जोड्ने उद्देश्यले यो अभियान सञ्चालन गरिएको आयोजकको भनाइ छ।
