काठमाडौं । गृहमन्त्री सुधन गुरुङले नवनियुक्त प्रहरी महानिरीक्षक डा. मनोजकुमार केसीलाई बुधबार दर्ज्यानी चिन्ह प्रदान गरेका छन् । गृह मन्त्रालयमा आयोजित कार्यक्रममा गुरुङले केसीको काँधमा आईजीपीको फूली लगाइदिएका हुन् ।
आजै बसेको मन्त्रिपरिषद्को बैठकले केसीलाई प्रहरीको सर्वोच्च पदमा नियुक्त गरेको थियो । यसअघि महानिरीक्षक रहेका दानबहादुर कार्कीलाई पदबाट हटाएर प्रधानमन्त्रीको विशेष सुरक्षा सल्लाहकारको जिम्मेवारी दिइएको छ ।
यसअघि नवनियुक्त महानिरीक्षकलाई गृहसचिवले दर्ज्यानी चिन्ह लगाइदिने चलन थियो । गृहमन्त्री आफैंले फूली लगाइदिएको यो पहिलो पटक भने होइन । प्रहरी इतिहासमा पहिलो पटक तत्कालीन गृहमन्त्री वामदेव गौतमले ध्रुवबहादुर प्रधानलाई आईजीपीको चिन्ह प्रदान गरेका थिए ।
सुरुमा अवकाशमा जाँदै गरेका महानिरीक्षकले नयाँ महानिरीक्षकलाई फूली लगाउने परम्परा थियो । प्रधानको पालामा त्यो परम्परा तोडियो र त्यसपछि गृहसचिवले चिन्ह लगाइदिने व्यवस्था चलेको थियो । अहिले गृहमन्त्री गुरुङले आफैं चिन्ह लगाइदिएसँगै त्यो चलन फेरि बदलिएको छ ।
गृह मन्त्रालयको जिम्मेवारी सम्हालेको तीन दिनपछि गत १६ चैतमा प्रहरी प्रधान कार्यालयको निरीक्षणमा पुगेका गुरुङले नवनियुक्त महानिरीक्षकलाई प्रधानमन्त्रीले फूली लगाउने व्यवस्था मिलाउन आफूले पहल गर्ने बताएका थिए ।
