काठमाडौँ — नेपाल भ्रमणमा रहेका भारतीय विदेश सचिव विक्रम मिश्रीले आज प्रधानमन्त्री बालेन्द्र शाहसँग शिष्टाचार भेट गर्दैछन्। दुईदिने भ्रमणको अन्तिम दिन हुने यो भेटमा प्रधानमन्त्री शाहको आगामी भारत भ्रमणको तयारी र त्यस क्रममा उठाउन सकिने विषयबारे छलफल हुने बुझिएको छ।
परराष्ट्र सचिव अमृत राईको निमन्त्रणामा मिश्री बुधबार काठमाडौँ आइपुगेका थिए। भ्रमणको पहिलो दिन उनले अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, ऊर्जामन्त्री विराजभक्त श्रेष्ठ, पूर्वाधार विकासमन्त्री सुनिल लम्साल र परराष्ट्र सचिव राईसँग छुट्टाछुट्टै भेट गरेका थिए।
ती भेटघाटमा नेपाल र भारतबीच सहकार्यका सम्भावित क्षेत्र तथा प्रधानमन्त्रीको भ्रमणका क्रममा छलफल गर्न सकिने एजेन्डाबारे कुराकानी भएको बताइएको छ। दुई देशबीचको सम्बन्धलाई थप सुदृढ बनाउने विषयमा पनि मन्त्रीहरूसँग छलफल भएको थियो।
विदेश सचिव मिश्री आज अपराह्न स्वदेश फर्किने कार्यक्रम छ। उनको यो भ्रमणलाई प्रधानमन्त्री शाहको भारत भ्रमणको तयारीसँग जोडेर हेरिएको छ।
