काठमाडौं — नेपाली कांग्रेसले पार्टीको नेतृत्व र वैधानिकतामाथि भ्रम सिर्जना गर्ने प्रयास भइरहेको निष्कर्ष निकाल्दै त्यसको संसद् र संसदीय समितिमार्फत सशक्त प्रतिवाद गर्ने निर्णय गरेको छ।
पार्टीका सहमहामन्त्री प्रकाश रसाइलीले पदाधिकारी तथा संघीय सांसदहरूसँगको बैठकपछि यस्तो जानकारी दिएका हुन्। उनका अनुसार राज्य संरक्षित तथा राज्य नियन्त्रित व्यक्तिहरूमार्फत पार्टी र नेतृत्वविरुद्ध भ्रम फैलाउने काम भएको छ, र पार्टीले त्यसको खुलेर विरोध गर्ने छ।
रसाइलीले पार्टीविरुद्ध भइरहेको भनिएको षड्यन्त्रलाई प्रतिनिधिसभा, संसदीय समिति र आम नागरिकमाझ तथ्यसहित उठाइने बताए। उनका अनुसार निर्वाचनका बेला पार्टीको अद्यावधिक अवस्था र वैधानिकतासँग सम्बन्धित नरहेका व्यक्तिहरूलाई समेत जोडेर पार्टी नेतृत्वविरुद्ध भ्रम फैलाउने काम भएको छ। कांग्रेसले संसद् अधिवेशन आह्वानको माग गरिसकेको र राज्यले जुनसुकै प्रकारको छानबिन गर्न चाहे पनि पार्टी त्यसबाट पछि नहट्ने उनको भनाइ छ।
बैठकले भोटेकोशी बाढीबाट प्रभावित नागरिकलाई सहयोग गर्ने विषयमा पनि छलफल गरेको छ। प्रभावित क्षेत्रका सांसद तथा जनप्रतिनिधिलाई २० गते दिउँसो २ बजे पार्टी कार्यालयमा बोलाइएको छ। चाडपर्वको समयमा प्रभावित नागरिकलाई पार्टीका तर्फबाट आवश्यक सहयोग गरिने निर्णय भएको रसाइलीले बताए।
