काठमाडौं । नेपाल प्रिमियर लिगमा काठमाडौं गोर्खाजले विराटनगर किंग्सलाई ८३ रनमै समेट्दै ८४ रनको सामान्य लक्ष्य पाएको छ। कीर्तिपुरमा भएको खेलमा टस जितेर फिल्डिङ रोजेको गोर्खाजले कसिलो बलिङ गर्दै विराटनगरलाई १९ ओभरको तेस्रो बलमा अलआउट गर्यो।
विराटनगरका लागि रुपेश सिंहले सर्वाधिक २६ रन बनाए भने एन्जेलो म्याथ्युजले २२ र बसिर अहमेदले १० रन जोडे। अन्य कुनै पनि ब्याट्सम्यानले दोहोरो अंकमा रन बनाउन सकेनन्। ओपनर लोकेश बम ६ रनमा आउट हुँदा आन्द्रे रसेलले ३ रन मात्र जोड्न सके।
गोर्खाजका लागि सन्तोष यादवले तीन विकेट लिए भने सहान अराच्चिगेले दुई विकेट हात पारे। कप्तान करण केसी, जहानदाद खान, साहब आलम र देव साहले एकएक विकेट लिए।
दुई खेल खेलेको काठमाडौंले एक जित र एक हारसँगै दुई अंक जोडेको छ भने चार खेल खेलेको विराटनगरको दुई जित र दुई हारसँगै चार अंक छ।
