चितवन — राष्ट्रिय स्वतन्त्र पार्टी (रास्वपा) का सभापति रवि लामिछानेले प्रहरी महानिरीक्षक दानबहादुर कार्कीलाई पदबाट हटाउने निर्णयको औचित्य सरकारले नै स्पष्ट पार्नुपर्ने बताएका छन्। बिहीबार चितवनमा सञ्चारकर्मीसँग कुरा गर्दै उनले सुरक्षा निकायको नेतृत्व हेरफेरसँग संवेदनशील विषय जोडिएकाले सरकारले उपयुक्त समयमा त्यसको कारण सार्वजनिक गर्ने विश्वास व्यक्त गरे।
‘सरकारले काम गर्न आवश्यक पर्ने कदम चाल्दा त्यसको औचित्य पुष्टि गर्ने जिम्मेवारी सरकारकै हुन्छ,’ लामिछानेले भने, ‘त्यो औचित्य सरकारले पुष्टि गर्ला भन्ने मलाई लाग्छ।’
पार्टीले प्रहरी नेतृत्व फेर्न सरकारलाई कहिल्यै नभनेको उनले दोहोर्याए। महानिरीक्षक, प्रहरी नायब उपरीक्षक वा निरीक्षक बदल्न पार्टीले निर्देशन नदिने उनको भनाइ थियो। पार्टी प्रवक्ताले यस विषयमा यसअघि नै प्रस्ट पारिसकेको उनले स्मरण गराए।
सरकार आफ्नो काम गरिरहेको बताउँदै लामिछानेले अझ राम्रो ढंगले काम गरे हुन्थ्यो भन्ने अपेक्षा सधैं रहने टिप्पणी गरे। पार्टी र सरकारबीच तालमेल नभएको भन्ने चर्चा असत्य भएको उनले बताए। सरकारका निर्णयमा थप स्पष्टता आवश्यक परे पार्टीले प्रश्न उठाउने र सन्तुलनको भूमिका खेल्ने उनको भनाइ थियो। ‘पार्टीले गरेका हरेक कुरामा सरकारले हो मा हो मिलाउँदैन, सरकारले गरेका कुरामा पनि पार्टीले हो मा हो मिलाउँदैन,’ उनले भने।
