मस्कोले जापानी बहुराष्ट्रिय कम्पनी जापान टोबाको इन्टरनेसनल (जेटीआई) का रुसस्थित सम्पत्ति आफ्नो नियन्त्रणमा लिने भएको छ। राष्ट्रपति भ्लादिमिर पुटिनले बिहीबार जारी गरेको निर्देशनमा ती सम्पत्ति अस्थायी प्रशासनअन्तर्गत राख्न आदेश दिइएको छ।
निर्देशनअनुसार जेनेभामा मुख्यालय रहेको जेटीआईको रूसी सञ्चालनअन्तर्गतका औद्योगिक सम्पत्ति एक रुसी कम्पनीलाई हस्तान्तरण गरिनेछ। जापानी पत्रकारलाई जासुसीको आरोपमा पक्राउ गरिएपछि जापान र रुसबीचको सम्बन्ध थप चिसिएको बेला मस्कोले यो कदम चालेको हो।
रुसले अन्तर्राष्ट्रिय प्रतिबन्धको जवाफमा विदेशी कम्पनीका सम्पत्ति तथा व्यवसाय आफ्नो नियन्त्रणमा लिने अभियान चलाउँदै आएको छ। यसअघि स्विस खाद्य कम्पनी नेस्ले र फ्रान्सेली सुपरमार्केट समूह अउसानले पनि रुसमा यस्तै अवस्थाको सामना गर्नुपरेको थियो। यो अभियानका कारण कैयौँ युरोपेली कम्पनीले आफ्ना रूसी व्यवसाय गुमाइसकेका छन्।
सन् २०२२ मा युक्रेनमाथि आक्रमण सुरु भएपछि सयौँ विदेशी कम्पनीले रुसी बजार छाडे पनि केहीले व्यवसाय जारी राखेका छन्।
रुसले आफूले ‘मित्रवत् नभएका’ ठानेका देशका कम्पनीमाथि आर्थिक प्रतिबन्ध लगाउँदै आएको छ। ती देशले युक्रेन युद्धका कारण मस्कोमाथि प्रतिबन्ध लगाएपछि रुसले लाभांश भुक्तानीमा रोक लगाउनुका साथै व्यवसाय बेचेर बाहिरिन चाहने विदेशी कम्पनीमाथि उच्च बहिर्गमन कर लगाएको छ। यसका कारण कतिपय कम्पनीले आफ्ना रूसी सम्पत्ति स्थानीय व्यवस्थापनलाई सुम्पेर बाहिरिनुपरेको छ।
जापानले पनि युक्रेनमाथिको रुसी आक्रमणपछि मस्कोविरुद्ध लगाइएका अन्तर्राष्ट्रिय प्रतिबन्धमा साथ दिएको छ। यसबाहेक प्रशान्त महासागरका केही द्वीपको स्वामित्वलाई लिएर जापान र रुसबीच दशकौँदेखि विवाद रहँदै आएको छ।
यसैबीच रुसी सुरक्षा सेवा (एफएसबी) ले गत महिना जापानी समाचारपत्र होक्काइदो शिम्बुनका पत्रकार युकी इमाईलाई जासुसी गतिविधिमा संलग्न रहेको आरोपमा पक्राउ गरेको थियो। मस्कोले जापानले आफ्नो देशभित्र जासुसीका लागि व्यवस्थित रूपमा पत्रकार प्रयोग गर्ने गरेको आरोपसमेत लगाएको छ। तर जापानले रुसी पक्षका आरोप अस्वीकार गर्दै आएको छ।
