उदयपुरको त्रियुगा नगरपालिकामा बसोबास गर्दै आएका ३८ परिवारले अन्ततः आफ्नो जग्गाको कानुनी स्वामित्व पाएका छन्। जिल्ला भूमि आयोग उदयपुरमार्फत कानुनी प्रक्रिया पूरा गरेका परिवारलाई बिहीबार जग्गाधनी पुर्जा वितरण गरिएको हो।
पुर्जा पाउने परिवार त्रियुगा नगरपालिका वडा नम्बर ३ र ५ का हुन्। वडा नम्बर ३ का ११ र वडा नम्बर ५ का २७ परिवारले पुर्जा प्राप्त गरेका छन्। यी परिवार भूमिहीन दलित, भूमिहीन सुकुमवासी तथा अव्यवस्थित बसोबासीका रूपमा वर्गीकृत थिए।
नगरप्रमुख वसन्तकुमार बस्नेतका अनुसार आवश्यक कानुनी प्रक्रिया पूरा गरेका परिवारलाई प्राथमिकताका आधारमा पुर्जा वितरण गरिएको हो। उनले बाँकी वडामा पनि प्रक्रिया पूरा भएपछि क्रमशः वितरण गर्दै जाने बताए।
वर्षौंदेखि जग्गा उपभोग गर्दै आए पनि कानुनी स्वामित्व नपाएका परिवारले पुर्जा पाएसँगै आफू बसोबास गरेको जग्गामाथि कानुनी अधिकार प्राप्त गरेका छन्। यसले उनीहरूलाई बैंक ऋण, जग्गा किनबेच र अन्य कानुनी प्रक्रियामा समेत सहज हुने अपेक्षा गरिएको छ।
प्रमुख जिल्ला अधिकारी कृष्णबहादुर शाहीले जिल्लाका विभिन्न स्थानीय तहमा पुर्जा वितरणको प्रक्रिया अघि बढिरहेको जानकारी दिए। भूमिहीन दलित, सुकुमवासी तथा अव्यवस्थित बसोबासीको समस्या समाधान गर्दै उनीहरूलाई जग्गाको कानुनी स्वामित्व प्रदान गर्ने उद्देश्यले काम भइरहेको उनको भनाइ छ।
आयोगका अनुसार शुक्रबार कटारी नगरपालिकाका ११ परिवारलाई पुर्जा वितरण गर्ने तयारी छ। त्यस्तै, रौतामाई गाउँपालिका–७ का ६५ परिवारको पुर्जा तयार भइसकेको छ भने चौदण्डीगढी नगरपालिकाका ३२ र बेलका नगरपालिकाका ४५ परिवारका लागि पनि पुर्जा वितरणको आवश्यक तयारी पूरा भएको छ।
