खोटाङ । राजनीतिमा सक्रिय तीन युवाले सामूहिक लगानीमा सुरु गरेको सयपत्री फूलको खेतीले पहिलो पटकमै राम्रो उत्पादन दिएको छ । दिक्तेल रुपाकोट मझुवागढी नगरपालिका–३ बाम्राङमा ‘खोटाङ एग्रो इन्डस्ट्री फार्म’ दर्ता गरेर करिब ४० रोपनी जग्गा भाडामा लिई गरिएको खेतीबाट तिहारमा करिब रु ३० देखि ३६ लाखसम्म आम्दानी हुने अनुमान गरिएको छ ।
फूलैफूलको चाड तिहार नजिकिँदै गर्दा बारीभरि पहेँलपुर फुलेका सयपत्री टिप्न र माला उन्ने काममा अहिले फार्मका सञ्चालकहरू व्यस्त छन् । यो वर्ष करिब १२ हजार माला तयार गर्ने लक्ष्य राखिएको छ । तीमध्ये नौ हजार माला काठमाडौँमा र तीन हजार जिल्लामै खपत हुने अनुमान छ । फूल टिप्न र माला उन्न दैनिक २५ जना कामदार खटिएका छन् । माला उन्नेलाई प्रतिमाला रु सातका दरले पारिश्रमिक दिइन्छ भने एक जना कामदारले एक दिनमा १०० भन्दा बढी माला तयार गर्न सक्छन् ।
फार्म सञ्चालक लेखबहादुर रम्तेल, बालकृष्ण कटवाल र चन्द्र केसी फरकफरक पार्टीमा आबद्ध छन् । उनीहरूले तीन वर्षअघिदेखि बाम्राङमा अकबरे खुर्सानी र व्यावसायिक भैँसीपालन पनि गर्दै आएका छन् । यस वर्ष दूध उत्पादनका लागि २० वटा लैनौ भैँसी पाल्ने गरी १०० रोपनी जग्गा भाडामा लिएर घाँसखेती गरिएको छ । फार्ममा दुई जना पूर्णकालीन कामदारलाई खाना तथा खाजासहित मासिक तलब दिइन्छ भने सिजनअनुसार अन्य कामदारलाई दैनिक रु ५०० देखि ८०० सम्म ज्याला दिइने गरिएको छ ।
फार्मबाट उत्पादित दूध तथा दूधबाट बनेका परिकार दिक्तेलबजारस्थित सालपा कृषि कम्पनीको ‘रैथाने कृषि मार्ट र रैथाने खाजा घर’ मा खपत हुन्छ । राजनीति गर्ने व्यक्तिलाई आम्दानीको वैकल्पिक स्रोत अनिवार्य हुनुपर्ने भएकाले सामूहिक लगानीमा कृषि व्यवसाय थालेको सञ्चालकहरूको भनाइ छ ।
