संसदीय सुनुवाइ समितिमा प्रस्तावित न्यायाधीशहरूमाथि परेका उजुरीबारे छलफल जारी छ। सिंहदरबारमा बसेको समितिको बैठकमा प्रस्तावित न्यायाधीश जनक पाण्डेविरुद्ध परेका उजुरी र उजुरीकर्ताका विषयमा छलफल भएको हो।
छलफलका क्रममा उजुरीकर्ता सुवास ढकालले प्रस्तावित न्यायाधीश पाण्डेकी श्रीमती मायापुरी पाण्डेले सार्वजनिक जग्गा आफ्नो नाममा ल्याएर हिनामिना गरेको दाबी गरे। उनले झापामा रहेको सार्वजनिक जग्गा कसरी उहाँको नाममा दर्ता भयो भन्ने प्रश्न उठाउँदै न्यायाधीशको नैतिकतामाथि प्रश्न गरे।
ढकालले उक्त विषयमा तथ्य र प्रमाण रहेको दाबी गरे। उनले अख्तियारमा मुद्दा दर्ता भएको, विशेष अदालतबाट फैसला भएको र व्यक्ति जेल गएको बताए। तर न्यायाधीशकी श्रीमतीले उन्मुक्ति पाउने कि नपाउने भन्ने सवाल उठाएको उनको भनाइ छ।
ढकालले आफूहरूले तथ्य र प्रमाणसहित उजुरी दिएको बताए। हिजोका कारणले आज न्यायालय रोइरहेको उनको भनाइ थियो। उनले आफूहरू सडकबाट मात्र कराउने नभएर मुद्दा नम्बर दिन पनि तयार रहेको बताए।
उजुरीकर्ताको भनाइ सुनेपछि समितिका सदस्यहरूले त्यसबारे धारणा राखेका थिए। समिति सदस्य वर्षमान पुनले दुई तहका अदालतबाट दुई थरी आदेश आएको भन्दै त्यस्तो अवस्थामा सचेत रहनुपर्ने बताए। उनले समितिले उजुरी पनि सुन्ने र प्रस्तावित न्यायाधीशका कुरा पनि सुन्ने बताए।
अर्का सदस्य मधु चौलागाईले श्रीमतीका नाममा दर्ता भएको जग्गाको दर्ताअघि नापी कसको नाममा थियो भनी प्रश्न गरे। उनले विशेष अदालतका न्यायाधीशले अर्का न्यायाधीशलाई प्रभावमा पारेर फैसला गरेको हो कि भन्ने प्रश्न पनि गरे।
समिति सदस्य अर्जुननरसिंह केसीले मायापुरी पाण्डे र जनक पाण्डेबिच श्रीमान्–श्रीमतीको सम्बन्ध रहेको भन्दैमा जग्गाबारेको संलग्नता कहाँ र कसरी रह्यो भन्ने प्रस्ट पार्न आग्रह गरे।
