इङ्गल्यान्डको दक्षिणपश्चिमी सहर साइरेन्सेस्टरमा झन्डै दुई हजार वर्षअघि गाडिएको एक बालकको चिहानबाट भेटिएका सामग्री अहिले सङ्ग्रहालयमा प्रदर्शनीमा राखिएका छन्। दोस्रो शताब्दीतिरको उक्त चिहानमा दुई वा तीन वर्षका बालकलाई गाडिएको थियो।
सन् २०११ मा कोट्सवल्ड आर्कियोलोजीका अनुसन्धानकर्ताहरूले रोमनकालीन ठूलो चिहानस्थल उत्खनन गर्ने क्रममा ती सामग्री फेला पारेका थिए। चिहानमा माटोबाट बनेको सानो पिउने भाँडो र तामामा इनामेल गरिएको कुखुराको मूर्ति राखिएको थियो।
उक्त भाँडोलाई ‘टेटिना’ भनिन्छ। यो रोमनकालीन शिशुलाई दूध वा झोल खुवाउन प्रयोग हुने बोतलजस्तो भाँडो हो। फेला पर्दा यो टुक्राटुक्रा भएको थियो। लामो समयपछि यसलाई पुनः जोडेर तयार पारिएको छ र अहिले कोरिनियम सङ्ग्रहालयमा कुखुराको मूर्तिसँगै राखिएको छ।
सङ्ग्रहालयका अनुसार कुखुराको मूर्ति देवता मर्करीको प्रतीक हो। त्यसबेला मानिसहरूले मर्करीले मृतकको आत्मालाई परलोकसम्म पुर्याउने विश्वास गर्थे। त्यसैले शोकमा डुबेका परिवारले बालकको आत्मा बाटो नभुलोस् भनेर कुखुराको मूर्ति र पिउने भाँडो चिहानमा राखेको अनुमान गरिएको छ।
साइरेन्सेस्टर रोमनकालमा कोरिनियम नामले चिनिन्थ्यो। त्यहाँको चिहानस्थलमा सयभन्दा बढी चिहान फेला परेका छन्। यी सामग्रीले रोमनकालीन परिवारले आफ्ना साना सन्तानप्रति देखाएको माया र मृत्युबारेको विश्वासलाई उजागर गरेको अनुसन्धानकर्ताहरूको भनाइ छ।
