काठमाडौं । सर्वोच्च अदालतका लागि सिफारिस गरिएका चार न्यायाधीशको नियुक्ति प्रक्रियामाथि संसदीय सुनुवाइ समितिमा उजुरी हालेका वरिष्ठ अधिवक्ता राजेश काफ्लेले न्यायपरिषद्को सिफारिस प्रक्रिया नै विवादरहित हुन नसकेको दाबी गरेका छन् ।
काफ्लेले पछिल्लो समय न्यायालयको साख र निष्पक्षतामाथि जनस्तरबाटै प्रश्न उठिरहेको बेला न्यायपरिषद्ले गरेको सिफारिसमाथि पनि संशय पैदा भएको बताए । परिषद्बाट एकल मत वा सर्वसम्मत रूपमा निर्णय हुन नसक्नुले नै सिफारिस विवादमा परेको उनको जिकिर छ ।
सिफारिस गर्दा न्यायाधीशका नाम एउटै मतबाट तय नभएको र परिषद्का सदस्यहरूले नै प्रश्न उठाएर विमति जनाएको विषयलाई समितिले गम्भीर रूपमा लिनुपर्ने उनको माग छ ।
काफ्लेले सिफारिस भएका चार जनामध्ये चन्द्रबहादुर सारु बाहेक अन्य प्रस्तावित न्यायाधीश राजनीतिक नियुक्तिका आधारमा आएको गम्भीर आरोप लगाए । न्यायालयलाई दलीय प्रभावबाट मुक्त राख्नुपर्ने संवैधानिक मर्मविपरीत राजनीतिक पहुँचका आधारमा हुने यस्ता नियुक्तिले समग्र न्यायप्रणालीको गरिमामा आँच पुग्ने उनको भनाइ छ ।
सिफारिस भएका न्यायाधीशहरूको नियुक्तिबारे संसदीय समितिमा सुनुवाइ भइरहेको छ । काफ्लेको दाबीले नियुक्ति प्रक्रियाको निष्पक्षतामाथि थप बहस चर्किने देखिएको छ ।
