प्रमुख प्रतिपक्षी दल नेपाली कांग्रेसले संसद्का दुई विषयगत समितिको बैठक बोलाउन माग गर्दै शुक्रबार छुट्टाछुट्टै निवेदन दर्ता गरेको छ। राज्य व्यवस्था तथा सुशासन समिति र सार्वजनिक लेखा समितिको बैठक बोलाउन माग गरिएको हो।
राज्य व्यवस्था तथा सुशासन समितिको बैठकका लागि रेखाकुमारी यादवको नेतृत्वमा र सार्वजनिक लेखा समितिको बैठकका लागि जनकराज गिरीको नेतृत्वमा निवेदन दर्ता भएको कांग्रेस संसदीय दलका नेता भीष्मराज आङ्देम्बेले जानकारी दिए।
राज्य व्यवस्था समितिमा चारवटा विषयमा छलफल माग गरिएको छ। प्रहरी हिरासतमा रहेका बिचौलियासम्बन्धी प्रकरण, विशेषगरी इनम प्रकरण, राज्यका निकायहरूको दुरुपयोग, नेपाल प्रहरीका महानिरीक्षकसँग सम्बन्धित विषय तथा सञ्चारमाध्यम र पत्रकारमाथि भइरहेको गिरफ्तारी र रिहाइका विषय ती हुन्।
सार्वजनिक लेखा समितिमा सुनकोशी–मरिण डाइभर्सन आयोजनाको ठेक्का रद्द गरिएको विषय, खरिद प्रक्रिया र वित्तीय अनियमितताबारे छलफल माग गरिएको छ। सार्वजनिक खरिद ऐनको कार्यान्वयन, प्राविधिक रूपमा छनोट भएका कम्पनीहरूको आर्थिक प्रस्ताव नखोली अघि बढाइएको खरिद प्रक्रिया, खरिद नियम र अधिकारको दुरुपयोग तथा सिँचाइ विभागका महानिर्देशक र आयोजना प्रमुखलाई नियन्त्रणमा लिइएको विषय पनि निवेदनमा समेटिएका छन्।
यसअघि बिहीबार बसेको कांग्रेस पदाधिकारी बैठकले दलका नेता आङ्देम्बेलाई दुवै समितिको बैठक माग गर्न निर्देशन दिएको थियो। महामन्त्री प्रदीप पौडेलले सोही निर्देशनअनुसार शुक्रबार निवेदन दर्ता भएको बताए। दुवै समितिमा निवेदन दर्ता भएसँगै उठाइएका विषयमा संसदीय छलफल र अध्ययनको प्रक्रिया अघि बढ्ने बाटो खुलेको छ।
