काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत शुक्रबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भइरहेको खेलमा सुदूरपश्चिम रोयल्सले कर्णाली याक्ससामु १७७ रनको लक्ष्य राखेको छ । टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १७७ रन बनायो ।
सुदूरपश्चिमका लागि जैफ जैबले सर्वाधिक ३५ रन बनाए । उनले २४ बलमा एक छक्का र चार चौका प्रहार गरे । विनोद भण्डारीले २२ बलमा दुई छक्का र दुई चौकासहित २७ रन जोडे भने ब्रान्डन म्याकमलेनले १६ बलमा एक छक्का र दुई चौकासहित २४ रन बनाए । इशान पाण्डेले १३ बलमा तीन छक्कासहित २३ रन र थरिन्दु रत्नायकेले १२ बलमा एक छक्का र तीन चौकासहित अविजित २२ रन बनाए ।
कर्णालीका लागि मार्क वाटले दुई विकेट लिए भने नन्दन यादव, हुसेन तलत र सूर्य तामाङले समान एक–एक विकेट हात पारे ।
आजै साँझ ४:३० बजे सोही मैदानमा चितवन राइनोज र पोखरा एभेन्जर्सबीच दोस्रो खेल हुँदैछ ।
