नेपाली कांग्रेसकी महामन्त्री डिला संग्रौलाले वर्तमान सरकारविरुद्ध कडा टिप्पणी गर्दै पार्टीमाथि भइरहेको षड्यन्त्र तत्काल बन्द गर्न चेतावनी दिएकी छन्।
शुक्रबार काठमाडौंमा रिपोर्टर्स क्लब नेपालले आयोजना गरेको साक्षात्कार कार्यक्रममा बोल्दै संग्रौलाले सरकारले आफ्ना कमजोरी र असफलता छोप्न कांग्रेसलाई निशाना बनाइरहेको आरोप लगाइन्। कुनै प्रमाणबिना १८ करोडको लेनदेन भएको भन्ने कथा बुनेर पार्टी सभापति थापाको छवि धमिल्याउन खोजिएको उनको भनाइ थियो।
संग्रौलाका अनुसार सरकारले आफ्ना गलत काम लुकाउनकै लागि कांग्रेस नेता गगन थापालाई पक्राउ गरिने भन्ने हल्ला फैलाएको छ। यस्ता हल्लाले कांग्रेसलाई डराउन नसकिने उनले स्पष्ट पारिन्।
राणा शासन, पञ्चायत र राजतन्त्रसँग समेत नडराएको कांग्रेस अहिलेको सरकारसँग डराउने कुरै नहुने भन्दै उनले लोकतन्त्र, गणतन्त्र, नागरिकका मौलिक अधिकार र प्रेस स्वतन्त्रताप्रति पार्टी पूर्ण रूपमा प्रतिबद्ध रहेको बताइन्।
निराधार आरोप र हल्लाले कांग्रेसलाई कमजोर बनाउन नसकिने उनको दाबी थियो। पार्टीविरुद्धको षड्यन्त्र जारी रहे कांग्रेस चुप लागेर नबस्ने र त्यसको प्रतिवाद गर्ने पनि उनले बताइन्।
सरकारले न्यायपालिका, प्रहरी र सञ्चार क्षेत्रमाथि हस्तक्षेप बढाएको उल्लेख गर्दै संग्रौलाले यस्तो प्रवृत्तिले देशको लोकतन्त्र नै संकटमा पर्ने हो कि भन्ने चिन्ता बढेको धारणा राखिन्।
