काठमाडौँ — डाँका चोरीको मुद्दामा सात वर्ष कैद भुक्तान गरेर भर्खरै जेलबाट छुटेका एक पूर्व सशस्त्र प्रहरी जवानसहित तीन जनालाई प्रहरीले खैरो हेरोइनसहित नियन्त्रणमा लिएको छ। लागुऔषध नियन्त्रण ब्यूरोको टोलीले बिहीबार काठमाडौँबाट उनीहरूलाई पक्राउ गरेको हो।
पक्राउ पर्नेमा गुल्मीको इस्मा गाउँपालिका–५ का ३७ वर्षीय युवराज भण्डारी, सप्तरीको राजबिराज नगरपालिका–३ का ३३ वर्षीय कौशलकुमार राय र धनुषाको नगराइन नगरपालिका–५ का गोपाल साह छन्। उनीहरूको साथबाट जम्मा १ सय ३२ ग्राम १ सय १० मिलिग्राम खैरो हेरोइन, दुई लाख ५० हजार रुपैयाँ नगद र डिजिटल तराजु बरामद भएको ब्यूरोले जनाएको छ।
ब्यूरोका प्रहरी उपरीक्षक दुर्गा रेग्मीका अनुसार सुरुमा काठमाडौँको तारकेश्वर नगरपालिका–८ स्थित शिव मन्दिर नजिकबाट भण्डारीलाई पक्राउ गरिएको थियो। उनको डेरा कोठामा खानतलासी गर्दा ३५ ग्राम ४ सय ६० मिलिग्राम हेरोइन र दुई लाख ५० हजार रुपैयाँ फेला पर्यो। उनको बयानका आधारमा भक्तपुरबाट साह र रायलाई पक्राउ गरी उनीहरूको साथबाट ९६ ग्राम ६ सय ५० मिलिग्राम हेरोइन बरामद गरिएको हो।
भण्डारी सशस्त्र प्रहरीका पूर्व जवान हुन्। उनी २०७६ साल भदौ १९ गते डाँका चोरी मुद्दामा पक्राउ परेका थिए र सात वर्ष कैद तथा ८० हजार रुपैयाँ जरिवाना भुक्तान गरी २०८३ भदौ २४ गते छुटेका थिए। अनुसन्धानका क्रममा छुट्नासाथै उनले लागुऔषधको कारोबार सुरु गरेको खुलेको छ।
भण्डारीलाई लागुऔषध उपलब्ध गराउने व्यक्ति नख्खु कारागारमा कैद भुक्तानका क्रममा चिनजान भएका एक भारतीय नागरिक रहेको अनुसन्धानबाट देखिएको छ। ती व्यक्ति जेनजी आन्दोलनका क्रममा २०८२ भदौ २४ गते कारागारबाट फरार भएका थिए। फरार भारतीयले सिरहा, धनुषा र विराटनगरका व्यक्तिहरूमार्फत काठमाडौँमा लागुऔषध पठाउने र भण्डारीले राजधानीमै बसेर बिक्री वितरण गर्ने गरेको प्रहरीको भनाइ छ। पक्राउ परेका तीनै जनामाथि लागुऔषध नियन्त्रण ऐनअनुसार थप अनुसन्धान भइरहेको छ।
