हुम्ला, २० कात्तिक — सुत्केरी व्यथा लागेर पाँच दिनदेखि थला परेकी एक महिलाको शुक्रबार बिहान हेलिकप्टरबाट उद्धार गरिएको छ । हुम्लाको नाम्खा गाउँपालिका–३ की ३३ वर्षीया डिकी साङमु लामालाई नेपाली सेनाको हेलिकप्टरमा प्रादेशिक अस्पताल सुर्खेत पुर्याइएको हो ।
व्यथा लागेकी लामाको जिल्ला अस्पताल हुम्लामा उपचार हुन सकेन । रगतको अभावका कारण उनलाई अस्पतालले जिल्ला बाहिर पठाउनुपरेको जिल्ला अस्पताल हुम्लाकी अनमी सरिता बोहराले जानकारी दिइन् । आमा र शिशु दुवैको ज्यान जोगाउन विभिन्न निकायसँग पहल गरेर शुक्रबार बिहान हेलिकप्टरमार्फत उद्धार गरिएको उनले बताइन् ।
जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काका अनुसार रगत नपाएपछि लामालाई उपचारका लागि जिल्ला बाहिर पठाइएको हो । पाँच दिनसम्म व्यथाले थलिएकी लामालाई समयमै अस्पताल पुर्याउन हेलिकप्टर नै एक मात्र विकल्प बनेको थियो ।
नेपाली सेनाको हेलिकप्टरको खर्च संघीय सरकारको महिला, बालबालिका तथा जेष्ठ नागरिक मन्त्रालयअन्तर्गतको राष्ट्रपति महिला उद्धार कार्यक्रमले बेहोर्दै आएको छ । सो कार्यक्रममार्फत यस्ता उद्धारमा लाग्ने हवाई खर्च सरकारले नै व्यहोर्ने व्यवस्था छ ।
