काठमाडौं — लुम्बिनी विकास कोषकी उपाध्यक्ष आनी छोइङ डोल्माको नागरिकतामाथि उठेका प्रश्नको निष्पक्ष छानबिन हुनुपर्ने माग गर्दै राष्ट्रिय जेन्जी नागरिक अभियानले शुक्रबार जिल्ला प्रशासन कार्यालय, काठमाडौंमा ज्ञापनपत्र बुझाएको छ।
अभियानले छोइङ डोल्माको नागरिकता र सम्पत्ति शुद्धीकरणसँग जोडिएका विषयमा सार्वजनिक रूपमा उठेका प्रश्नको छानबिन गर्न माग गरेको हो।
अभियानका संयोजक सुनिल सिंहले सार्वजनिक पदमा पुगेका व्यक्तिको नागरिकतादेखि आर्थिक पारदर्शितासम्मका विषयमा प्रश्न उठेपछि आम नागरिकले सत्यतथ्य जान्न पाउनुपर्ने बताए। सम्बन्धित निकायले यस्ता विषयमा स्पष्ट जवाफ दिनुपर्ने उनको भनाइ छ।
सार्वजनिक जिम्मेवारीमा रहेका व्यक्तिको नियुक्ति प्रक्रियासँगै उनीहरूको पृष्ठभूमि र पारदर्शिताबारे नागरिकले चासो राख्नु स्वाभाविक भएको सिंहले बताए।
अभियानले यस विषयमा लामो समयदेखि खबरदारी गर्दै आएको उल्लेख गर्दै नागरिकले उठाएका प्रश्नलाई बेवास्ता गर्न नहुने अभियन्ताहरूको भनाइ छ।
लुम्बिनी विकास कोषको उपाध्यक्षमा नियुक्त भएपछि छोइङ डोल्माको नागरिकता र सम्पत्तिबारे सार्वजनिक रूपमा प्रश्न उठ्दै आएका छन्।
ज्ञापनपत्रमा सार्वजनिक पदमा नियुक्त व्यक्तिको नागरिकता र सम्पत्तिबारे उठेका प्रश्नको छानबिन गरी सत्यतथ्य सार्वजनिक गर्न माग गरिएको छ। नागरिकले उठाएका प्रश्नलाई बेवास्ता गर्न नहुने अभियानको धारणा छ।
