काठमाडौँ प्रहरीको हिरासतमा रहेका ईनम सापकोटाबारे अनुसन्धान जारी रहेको र अनुसन्धान सकिएपछि देखिएका सबै विषय सार्वजनिक गरिने जिल्ला प्रहरी परिसर काठमाडौँका प्रमुख एसएसपी दिलीप घिमिरेले बताएका छन् । शुक्रबार जिल्ला प्रहरी परिसर काठमाडौँमा आयोजित पत्रकार सम्मेलनमा उनले अनुसन्धानबारे अहिले आफ्नो युनिटले कुनै धारणा सार्वजनिक नगरेको जानकारी दिए ।
ईनमको सम्पर्क सर्वोच्चका न्यायाधीश, प्रधानमन्त्रीको सचिवालय र प्रहरीका उच्च अधिकृतहरूसँग देखिएको छ । उनले प्रहरी अधिकृतहरूसँग सोधपुछका क्रममा बोलेको अडियो समेतका सामग्री बाहिरिएका छन् ।
पूर्वप्रधानन्यायाधीश चोलेन्द्र शमशेर जबरासँग ‘कनेक्सन’ देखिएपछि पक्राउ परेका ईनमबारे अनुसन्धान भइरहेको एसएसपी घिमिरेले बताए । ‘त्यस विषयमा प्रहरीले अनुसन्धान गरिरहेको छ,’ उनले भने ।
अडियो कसरी र के आयो भन्ने विषय पनि अनुसन्धानकै पाटो भएको उनले बताए । ‘अनुसन्धान सकिएपछि हामी देखिएका विषय सार्वजनिक गर्छौं,’ घिमिरेले भने ।
