खाँदबारीको मानेभञ्याङमा सम्पन्न सङ्खुवासभा गोल्डकप फुटबल प्रतियोगिताको उपाधि घरेलु टोली सेकाहा सामुदायिक क्लबले आफ्नो नाममा लेखाएको छ। महेन्द्र माध्यमिक विद्यालयको खेलमैदानमा शुक्रबार भएको फाइनल भिडन्तमा सेकाहाले सुनसरीको न्यू स्टार क्लबलाई २–१ गोलअन्तरले पराजित गर्दै ट्रफी उचालेको हो।
खेलको सुरुवातदेखि नै दुवै टोलीले आक्रामक खेल प्रदर्शन गरेका थिए। पहिलो हाफको अन्तिमतिर सेकाहाका मिलन लिम्बुले ४५औँ मिनेटमा गोल गर्दै आफ्नो टोलीलाई अग्रता दिलाए। दोस्रो हाफ सुरु भएको पाँच मिनेटमै लिम्बुले व्यक्तिगत दोस्रो गोल थप्दै सेकाहाको अग्रता दोब्बर बनाए।
दुई गोलले पछि परेको न्यू स्टारले हार मान्न मानेन। खेलको ६०औँ मिनेटमा सेकाहाका खेलाडीले पेनाल्टी क्षेत्रभित्र फल गरेपछि पाएको पेनाल्टीमा सन्दीप श्रेष्ठले गोल गर्दै अन्तर घटाए। त्यसपछि दुवै टोलीले थप गोल गर्न नसक्दा सेकाहा २–१ ले विजयी बन्यो।
खेलका क्रममा दुवै टोलीका खेलाडीबीच मैदानमै हात हालाहाल भएपछि दुवैतर्फका खेलाडीले रातो कार्ड पाएका थिए। तनावपूर्ण बनेको खेलमा पनि सेकाहाले अग्रता जोगाउँदै उपाधि आफ्नो पक्षमा पार्न सफल भयो।
उपाधिसँगै सेकाहाले नगद पाँच लाख रुपैयाँसहित ट्रफी, मेडल र प्रमाणपत्र प्राप्त गर्यो। उपविजेता न्यू स्टारले तीन लाख रुपैयाँसहित ट्रफी, मेडल र प्रमाणपत्रमा चित्त बुझायो। प्रतियोगितामा सेकाहाका दोर्जे तामाङ उत्कृष्ट खेलाडी घोषित भए भने सेकाहाकै विपुल मगर उत्कृष्ट गोलरक्षक र न्यू स्टारका सञ्जय श्रेष्ठ उत्कृष्ट डिफेन्डर घोषित भए।
अरुण उपत्यका सामुदायिक विकास क्लबको आयोजनामा भएको प्रतियोगितामा विभिन्न जिल्लाका आठ टोली सहभागी थिए। विजेता तथा उपविजेता टोलीलाई कोशी प्रदेशका मुख्यमन्त्री हिक्मतकुमार कार्कीले पुरस्कार वितरण गरे। सो अवसरमा मुख्यमन्त्री कार्कीले प्रदेश सरकार खेलकुद क्षेत्रमा लगानी गर्न तयार रहेको बताए। कार्यक्रममा कोशी प्रदेशका आर्थिक मामिला तथा योजनामन्त्री विदुरकुमार लिङ्थेप र प्रदेशसभा सदस्य राजेन्द्र कार्कीको उपस्थिति थियो।
