सुर्खेत । लागुऔषधको अवैध कारोबारमा संलग्न भएको आरोपमा प्रहरीले सुर्खेतबाट सशस्त्र प्रहरी बलका दुई जना कर्मचारीसहित चार जनालाई नियन्त्रणमा लिएको छ । लागुऔषध नियन्त्रण ब्यूरोबाट खटिएको टोलीले वीरेन्द्रनगर नगरपालिकाबाट उनीहरूलाई पक्राउ गरेको हो ।
पक्राउ पर्नेमा सशस्त्र प्रहरीका सहायक हवल्दार ३५ वर्षीय नवराज चालिसे र कार्यालय सहयोगी २३ वर्षीय रुपेश घर्ती मगर रहेका छन् । दुवै जना वीरेन्द्रनगर नगरपालिकाका बासिन्दा हुन् र हाल सशस्त्र प्रहरीको नम्बर ६ महेश्वरी बाहिनीमा कार्यरत थिए । चालिसेको साथबाट परिचयपत्र र घर्ती मगरको साथबाट नियुक्तिपत्र फेला परेको ब्यूरोले जनाएको छ ।
यसैगरी पक्राउ पर्ने अन्य दुई जनामा वीरेन्द्रनगर नगरपालिका १३ का २७ वर्षीय कुमार बहादुर रास्कोटी र वीरेन्द्रनगर १२ का ३१ वर्षीय बलराम पौडेल छन् । उनीहरूको साथबाट १३ ग्राम ७०० मिलिग्राम खैरो हेरोइन बरामद भएको ब्यूरोका प्रवक्ता प्रहरी उपरीक्षक दुर्गाराज रेग्मीले जानकारी दिए ।
प्रहरीले शुक्रबार रास्कोटीलाई पक्राउ गरेर सोधपुछ गर्दा उनले घर्ती मगरसँग हेरोइन खरिद गर्ने गरेको बताएका थिए । त्यसपछि घर्ती मगरलाई नियन्त्रणमा लिइएको हो । अर्का पक्राउ परेका पौडेलले भने चालिसेबाट हेरोइन खरिद गरेको बयान दिएका छन् । अनुसन्धानका क्रममा दुवै सशस्त्र प्रहरी कर्मचारी सँगै नेपालगञ्ज गएर हेरोइन किनेर सुर्खेत ल्याएको खुलेको छ । थप अनुसन्धानका लागि आरोपीहरूलाई जिल्ला प्रहरी कार्यालय सुर्खेतमा पठाइएको छ ।
