पोखरा महानगरपालिका–२२ पुम्दीभुम्दीमा भएको मोटरसाइकल दुर्घटनामा एक जनाको ज्यान गएको छ। स्थानीय सुरेश लामिछानेको दुर्घटनामा मृत्यु भएको प्रहरीले जनाएको छ।
आइतबार बिहान लीला आधारभूत विद्यालय नजिकै क्षतिग्रस्त अवस्थामा पल्सर मोटरसाइकल देखेपछि स्थानीय बासिन्दाले प्रहरीलाई खबर गरेका थिए। प्रहरी टोलीले खोजतलास गर्दा निर्माणाधीन पर्खालको नालीमा लामिछाने अचेत अवस्थामा भेटिएका थिए। घटनास्थलमा पुगेको चिकित्सकको टोलीले उनलाई मृत घोषणा गरेको हो।
प्रारम्भिक विवरणअनुसार मोटरसाइकल पिच सडकबाट अनियन्त्रित भई करिब दुई मिटर तल खसेको थियो। मोटरसाइकल र चालक दुवै सडकभन्दा तल खसेको अवस्थामा भेटिएका थिए।
घटनाको प्रकृति शंकास्पद देखिएपछि प्रहरीले अनुसन्धानलाई गम्भीरताका साथ अगाडि बढाएको छ। वडा प्रहरी कार्यालय बैदामका प्रहरी नायव उपरीक्षक सूर्य बोगटीको नेतृत्वमा प्रहरी टोली परिचालन गरिएको छ। थप प्रमाण संकलनका लागि प्रहरीले तालिमप्राप्त कुकुरको समेत सहायता लिएको छ।
जिल्ला प्रहरी कार्यालय कास्कीका निमित्त सूचना अधिकारी प्रहरी निरीक्षक दीपक रिजालले प्रारम्भिक अनुसन्धानमा मोटरसाइकल सडकबाट चिप्लिएको संकेत देखिए पनि घटनाको यथार्थ विवरणबारे सूक्ष्म अनुसन्धान जारी रहेको बताए। दुर्घटनाको कारण र समय पहिचानका लागि प्रहरीले थप प्राविधिक विधि अपनाइरहेको जनाएको छ।
