अमेरिकी सेनाले इरानभित्र हतियार र निषेधित सामग्री पुग्ने भूमि बाटोहरू थुन्न २० जनाको विशेष टोली खडा गर्ने भएको छ।
अमेरिकी सेन्ट्रल कमाण्डका प्रमुख ब्राड कूपरले शनिबार एक्समार्फत सार्वजनिक गरेको वक्तव्यअनुसार फ्लोरिडामा रहने यो टोलीमा नागरिक र सैनिक दुवै कर्मचारी हुनेछन्। टोलीले अमेरिकी सरकारी निकायहरूसँग मिलेर उन्नत हतियार प्रणाली, दोहोरो प्रयोग हुने प्रविधि, प्रतिबन्धित सामग्री र अवैध आम्दानीका स्रोतहरूलाई इरानका स्थल सीमा तथा क्यास्पियन सागर हुँदै ओहोरदोहोर गर्नबाट रोक्ने काम गर्नेछ।
कूपरले यो कदमले इरानको आतङ्कवादलाई पैसा जुटाउने, हतियार कारखाना फेरि बनाउने र आफ्नो सैन्य शक्ति भर्ने क्षमतालाई थप साँघुरो पार्ने बताएका छन्।
यो घोषणा दुई देशबीच आठ महिना चलेको युद्धपछि आएको हो। युद्धका क्रममा अमेरिकी नौसेनाले इरानी बन्दरगाहहरूमा नाकाबन्दी लगाएको थियो भने तेहरानले होर्मुज जलमार्गमा आवागमन रोक्दै विश्वव्यापी ऊर्जा आपूर्तिमा असर पारेको थियो।
सेन्टकमका अनुसार नौसेनाको नाकाबन्दीले इरानलाई २५ अर्ब डलरभन्दा बढीको कच्चा तेल निर्यात गर्नबाट रोकेको छ। गत अगस्टमा वासिङटनले इरानको पहिल्यै कमजोर अर्थतन्त्रलाई थप साँघुरो पार्न ‘आर्थिक श्वासरोधन’ अभियान घोषणा गरेको थियो।
इरानको इस्लामिक रिवोल्युसनरी गार्ड कप्र्सले भने वासिङटनको यो पछिल्लो प्रयास असफल हुने दाबी गरेको छ। गार्डका प्रवक्ता होसेन मोहेबीले फार्स समाचार एजेन्सीलाई भनेका छन्, ‘संयुक्त राज्य अमेरिकाले विभिन्न नाम र योजनाहरूमार्फत अगाडि बढाउन खोजेको आर्थिक नाकाबन्दी कहिल्यै लागू गर्न सक्दैन।’ अमेरिकाले चरम आर्थिक दबाब दिएर इरानको अर्थतन्त्र पतन गराउने उद्देश्य पूरा गर्न नसक्ने र इरानसँग छिमेकी देशहरूका सञ्चार माध्यम अवरुद्ध गर्न पनि नसक्ने उनको भनाइ छ।
