अष्ट्रेलियाको वोलोंगोंगस्थित इलावारा क्षेत्रमा रहेका नेपालीहरूले तिहारको अवसरमा देउसी–भैलो कार्यक्रम आयोजना गरी पर्वको उल्लास मनाएका छन्। वोलोंगोंग इलावारा नेपाली समुदायको आयोजनामा सम्पन्न कार्यक्रममा नेपाली समुदायका धेरै सदस्य सहभागी भएका थिए।
कार्यक्रममा नेपाली लोकगीत, दोहोरी तथा आधुनिक लाइभ संगीतका प्रस्तुति राखिएका थिए। सहभागीहरू गीतसंगीतमा झुम्दै, नाच्दै र गाउँदै तिहारको रमझममा सहभागी भए। उनीहरूले एकअर्कालाई शुभकामना आदानप्रदान गर्दै प्रवासमा पनि आफ्नो संस्कृति र परम्परालाई सामूहिक रूपमा मनाए।
कार्यक्रममा मल्टिकल्चरल कम्युनिटिज काउन्सिल अफ इलावारा (एमसीसीआई) का प्रमुख कार्यकारी अधिकृत क्रिसको विशेष उपस्थिति थियो। उनले इलावारा क्षेत्रमा नेपाली समुदायको संख्या निरन्तर बढ्दै गएको उल्लेख गर्दै नेपाली समुदायसँग सहकार्य गरेर अघि बढ्ने प्रतिबद्धता जनाए। समुदायको विकास र हितका लागि आवश्यक सहयोग गर्न आफूहरू तयार रहेको उनले बताए।
वोलोंगोंग इलावारा नेपाली समुदायका अध्यक्ष सञ्जीव अमगाईंले प्रवासमा रहेर पनि भाषा, कला, संस्कृति र मौलिक पहिचान जोगाउनु सबै नेपालीको साझा जिम्मेवारी भएको बताए। यस्ता कार्यक्रमले नेपाली समुदायबीच एकता र भाइचारा बढाउनुका साथै नयाँ पुस्तालाई नेपाली परम्परासँग जोड्न मद्दत गर्ने उनको भनाइ थियो।
संस्थाले आगामी दिनमा पनि नेपाली संस्कृति र सामुदायिक एकताको प्रवर्द्धनका लागि यस्ता कार्यक्रमलाई निरन्तरता दिने जनाएको छ।
