नेपाली कांग्रेसका सहमहामन्त्री अजयबाबु शिवाकोटी नेपाल प्रहरीको साइबर ब्युरोको कार्यालयमा उपस्थित भएका छन्। उनीविरुद्ध उजुरी परेपछि ब्युरोले उपस्थित हुन ताकेता गरेको थियो। उनी आइतबार दिउँसो साइबर ब्युरो पुगेका थिए।
ब्युरो प्रवेश गर्नुअघि सञ्चारकर्मीसँग कुरा गर्दै शिवाकोटीले सरकारको दबाबमा परेर साइबर ब्युरोमार्फत आफूलाई ताकेता गर्ने र अनुसन्धान गर्ने काम भइरहेको आरोप लगाए। सत्तारुढ दल र प्रधानमन्त्री बालेन निकट व्यक्तिहरूले कांग्रेस र नेतृत्वमाथि निरन्तर प्रहार गर्दा आफूले त्यसको प्रतिक्रिया दिएको र त्यसै कारण आफूलाई ब्युरोले बोलाएको हुनसक्ने उनले उल्लेख गरे।
शिवाकोटीले अहिलेका प्रधानमन्त्रीले विगतमा ‘सिंहदरबार जलाइदिन्छु’ भन्दा त्यसलाई अभिव्यक्ति स्वतन्त्रताको रूपमा लिइएको स्मरण गराए। तर अहिले उनी नै प्रधानमन्त्री भएको बेला उनका सल्लाहकार र निकटहरूले प्रतिपक्षीको आवाज रोक्न खोजेको उनको भनाइ छ।
