म्याग्दीको बेनीमा सम्पन्न चौथो बौद्ध कप खुला फुटबल प्रतियोगिताको उपाधि एभरग्रिन युवा क्लबले आफ्नो नाममा लेखाएको छ । आइतबार भएको फाइनल खेलमा एभरग्रिनले मितेरी युवा क्लबलाई ३–० को स्पष्ट अन्तरले हराउँदै च्याम्पियन बन्यो ।
बेनी नगरपालिका–७ मङ्गलाघाटस्थित मैदानमा बौद्ध युवा क्लबले आयोजना गरेको प्रतियोगिताको फाइनलमा मालिका गाउँपालिका–६ दुखुको मितेरी युवा क्लब पराजित भयो । यसअघि भएको तेस्रो स्थानको खेलमा पश्चिम म्याग्दी युवा क्लबले मनसुन युवा क्लबलाई ३–० ले नै हराएर तेस्रो स्थान सुरक्षित गर्यो ।
पाँच दिनसम्म चलेको प्रतियोगितामा विजेता एभरग्रिनले ट्रफी, मेडल र प्रमाणपत्रसहित नगद दुई लाख २२ हजार २२२ रुपैयाँ प्राप्त गर्यो । उपविजेता मितेरीले एक लाख ११ हजार १११ र तेस्रो भएको पश्चिम म्याग्दीले ५५ हजार ५५५ रुपैयाँ पाए । अनुशासित टिम घोषित बरबुटा युवा क्लब खबराले २२ हजार २२२ रुपैयाँ हात पार्यो ।
व्यक्तिगत पुरस्कारमा एभरग्रिनका रोशन छन्त्याल उत्कृष्ट खेलाडी घोषित भए भने मितेरीका सन्दिप गुरुङ उत्कृष्ट डिफेन्डर र नौ गोल गरेका पश्चिम म्याग्दीका विपुल कार्की सर्वाधिक गोलकर्ता बने । एभरग्रिनका आसिस केसी उत्कृष्ट गोलरक्षक, अमृत तामाङ उत्कृष्ट फरवार्ड र निराजन खत्री उत्कृष्ट मिडफिल्डर चुनिए । उनीहरू सबैले सात हजार ७७७ रुपैयाँसहित मेडल, ट्रफी र प्रमाणपत्र पाए ।
गण्डकी प्रदेशसभा सदस्य हरिबहादुर भण्डारी, क्लबका अध्यक्ष दुर्गा बुढामगर र म्याग्दी उद्योग वाणिज्य सङ्घका अध्यक्ष सुविन श्रेष्ठलगायतले पुरस्कार वितरण गरे । दसैँ–तिहारको अवसरमा कात्तिक १८ गतेदेखि सुरु भएको प्रतियोगितामा १८ टिम सहभागी भएका थिए ।
प्रतिव्यक्ति ५० रुपैयाँका दरले सङ्कलन गरिएको प्रवेश शुल्कको ४० प्रतिशत रकम असोजको दोस्रो साता आएको बाढीपहिरोबाट प्रभावितलाई राहतस्वरूप हस्तान्तरण गरिने आयोजकले जनाएको छ । प्रतियोगिताबाट बचत भएको रकम क्लबको कार्यालय भवन निर्माण तथा कोष स्थापनामा खर्च गर्ने लक्ष्य रहेको अध्यक्ष बुढामगरले बताए ।
