वासिङ्टन । अमेरिकी विदेशमन्त्री मार्को रुबियोले रुस–युक्रेन युद्ध समाप्त भएपछि युक्रेन र युरोपको सुरक्षा व्यवस्था कस्तो हुने भन्ने विषयमा केही अग्रगति भएको बताएका छन्। यसै हप्ता अबुधाबीमा हुन लागेको वार्ताले यस विषयमा थप प्रगति ल्याउने अपेक्षा उनले व्यक्त गरेका छन्।
जी–सात राष्ट्रका विदेशमन्त्रीहरूको बैठकमा सहभागी हुन पेरिस जानुअघि आइतबार सञ्चारकर्मीसँग कुरा गर्दै रुबियोले युद्ध अन्त्यका लागि सुरक्षा प्रत्याभूति केन्द्रीय विषय रहेको बताए। सन् २०२२ मा रुसले युक्रेनमाथि आक्रमण गरेदेखि नै यो विषय पटकपटक छलफलमा आएको उनको भनाइ थियो।
युद्धपछिको अवस्थामा युक्रेनसँगै सम्पूर्ण युरोपेली महादेशको सुरक्षा संरचना कस्तो हुन्छ भन्ने प्रश्नमा छलफल भइरहेको उनले जानकारी दिए। राष्ट्रपति डोनाल्ड ट्रम्पले संकेत गरेको संरचनातर्फ केही प्रगति भएको रुबियोको दाबी छ।
ट्रम्पले गत बिहीबार युक्रेन मात्र नभई समग्र युरोपलाई समेट्ने गरी रुससँग बृहत् सम्झौता हुन सक्ने बताएका थिए। तर रुबियोले अहिलेसम्म कुनै पनि विषयमा अन्तिम सहमति भइनसकेको स्पष्ट पारे।
रुस–युक्रेन युद्ध अन्त्य गर्ने प्रयासअन्तर्गत अमेरिकी मध्यस्थतामा मंगलबार र बुधबार अबुधाबीमा वार्ता हुँदैछ। उक्त वार्तामा अमेरिकाका तर्फबाट विशेष दूत स्टिभ विटकफ र राष्ट्रपति ट्रम्पका ज्वाइँ जारेड कुसनर सहभागी हुने अपेक्षा गरिएको छ।
