नेपालमा पटका आयात र प्रयोगमा प्रतिबन्ध लागेको भए पनि उपत्यकामा रातभर पटका पड्किने क्रम रोकिएको छैन। कोटेश्वर क्षेत्रका बासिन्दा रातभर पटकाको आवाजले निदाउन नसकेको गुनासो गरिरहेका छन्। स्थानीय सुनिल तामाङका अनुसार प्रहरीको गाडीको साइरन सुनिएपछि केहीबेर शान्त हुने र फेरि पड्किन थाल्छ।
भारतको रक्सौललगायत बजारबाट सीमाना हुँदै पटका वीरगञ्ज र तराई हुँदै काठमाडौँसम्म आइपुग्ने गरेको छ। त्यहाँबाट पहाडी जिल्लासम्म पनि पुग्छ। जिल्ला प्रहरी परिसर काठमाडौँले असोज १६ पछि मात्र ७ लाख १२ हजार रुपैयाँ बराबरको पटका बरामद गरेको छ। एसएसपी दिलिप घिमिरेका अनुसार पटका ओसारपसारमा संलग्न ७ जनालाई नियन्त्रणमा लिएर अनुसन्धान भइरहेको छ। उनले यस वर्ष ओसारपसार केही कम भएको दाबी गरे। उनका अनुसार पटका लुकिछिपी व्यक्तिगत रूपमा थोरै परिमाणमा निजी र सार्वजनिक गाडीमा ल्याउने गरिन्छ।
ललितपुर प्रहरीले सातदोबाटो क्षेत्रबाट ३ हजार पिस पटका बरामद गरेको छ। एसएसपी तुल बहादुर कार्कीका अनुसार पटका ओसारपसार गर्ने ३ जनाविरुद्ध मुद्दा चलाइएको छ। भक्तपुर प्रहरीले पनि विभिन्न स्थान र किराना पसलबाट पटका बरामद गरेको छ।
सशस्त्र प्रहरी बलले चालु आर्थिक वर्षको साउनदेखि कात्तिक २० गतेसम्म देशका विभिन्न नाकाबाट १ करोड २१ लाख २८ हजार ६ सय ६९ रुपैयाँ बराबरको पटका बरामद गरिसकेको छ। मधेस प्रदेशबाट सबैभन्दा बढी ७४ लाख ३१ हजार रुपैयाँ बराबरको पटका बरामद भएको छ। लुम्बिनीबाट १८ लाख, सुदूरपश्चिमबाट १४ लाख, कोशीबाट ११ लाख ४९ हजार र बागमतीबाट २ लाख ३५ हजार रुपैयाँ बराबरको पटका बरामद गरिएको हो।
पटकाकै कारण पर्सामा पाँच वर्षीय बालकले ज्यान गुमाएका छन्। पकाहा मैनपुर गाउँपालिका–२ मधुबनीका मखु सहनीका छोराको पटका पड्काउने क्रममा जलेर मृत्यु भएको जिल्ला प्रहरी कार्यालय पर्साले जनाएको छ।।
