निर्देशक नितेश तिवारीको फिल्म ‘रामायणः पार्ट–१’ले प्रदर्शनको चार दिनमै विश्वभर ५०७ करोड २० लाख भारु कमाएको छ। सुरुदेखि नै बक्स अफिसमा बलियो देखिएको फिल्मले चार दिनमा ५०० करोडको आँकडा पार गरेको हो।
कलेक्सन ट्र्याक गर्ने वेबसाइट स्याकनिल्कका अनुसार फिल्मले भारतमा मात्रै चार दिनमा २५२ करोड ७८ लाख भारु नेट र ३०१ करोड ६४ लाख भारु ग्रस कमाइ गरेको छ। विदेशको कमाइ थपिँदा विश्वव्यापी ग्रस ५०७ करोड २० लाख भारु पुगेको हो।
यो कमाइसँगै फिल्म सन् २०२६ मा सर्वाधिक कमाउने भारतीय फिल्मको सूचीमा चौथो स्थानमा पुगेको छ। हिन्दी फिल्मको सूचीमा भने यो तेस्रो स्थानमा छ। अब यसको नजर दोस्रो स्थानमा रहेको अजय देवगन अभिनीत ‘दृश्यम–३’तर्फ छ, जसले विश्वभर ५७४ करोड भारु कमाएको बताइएको छ।
तर, रेकर्डको गतिमा भने फिल्म केही पछाडि छ। यस वर्षकै सर्वाधिक कमाउने ‘धुरन्धरः द रिभेन्ज’ले तीन दिनमै ५०० करोडभन्दा बढी कमाएको थियो।
व्यावसायिक रूपमा हिट हुन फिल्मले अझै लामो यात्रा तय गर्नुपर्ने ट्रेड विज्ञहरू बताउँछन्। ट्रेड एक्सपर्ट सुमित कडेलका अनुसार फिल्मलाई हिट बन्न हिन्दीमा ९०० देखि १००० करोड र विश्वभर २५०० करोड भारु आवश्यक पर्छ। उनले सोमबार र मंगलबार १००–१०० करोड कमाउन नसके हिन्दी संस्करणको कुल कमाइ ६०० देखि ७०० करोडमा सीमित हुन सक्ने अनुमान गरेका छन्।
