काठमाडौं । गत आर्थिक वर्षको पहिलो त्रैमासमा १७५ जना विदेशी नागरिक नेपालबाट निष्कासनमा परेका छन्। गृह मन्त्रालयले हालै सार्वजनिक गरेको त्रैमासिक प्रगति विवरणमा यो तथ्यांक उल्लेख छ।
विवरणअनुसार साउन महिनामा ५२ जना, भदौ महिनामा ५९ जना र असोज महिनामा ६४ जना विदेशी नागरिकलाई नेपालबाट फर्काइएको हो। मन्त्रालयको सीमा तथा अध्यागमन शाखाले गरेको कामको विवरणमा यो संख्या समेटिएको छ।
कुन कारणले ती नागरिकलाई निष्कासन गरिएको हो भन्नेबारे सरकारले विस्तृत विवरण दिएको छैन। मन्त्रालयले केवल संख्या सार्वजनिक गरेको छ, कारण खुलाएको छैन।
सूचनाको हकसम्बन्धी ऐन, २०६४ को दफा ५ को उपदफा (३) र नियमावली, २०६५ को नियम ३ बमोजिम सबै सार्वजनिक निकायले आफ्नो कामकारबाहीको विवरण प्रत्येक तीन महिनामा अद्यावधिक गरी प्रकाशन गर्नुपर्ने व्यवस्था छ। सोही व्यवस्थाअन्तर्गत गृह मन्त्रालयले आफ्नो त्रैमासिक प्रगति विवरण सार्वजनिक गरेको हो।
ऐनको उद्देश्य सरकारी कामकारबाहीलाई पारदर्शी, जवाफदेही र खुला बनाउनु हो। मन्त्रालयले आफ्नो प्रगति विवरण सार्वजनिक गर्दै सोही उद्देश्यअनुसार काम गरिरहेको जनाएको छ।
