बारा । बिरामीको चाप निरन्तर बढ्दै गएपछि जीतपुरसिमरा उपमहानगरपालिकाले चारतले नयाँ भवनबाट नगर अस्पतालको सेवा सुरु गरेको छ । पुरानो भवन जीर्ण र साँघुरो हुँदै गएपछि कात्तिकको दोस्रो सातादेखि विशेषज्ञ चिकित्सकसहितको सेवा नयाँ भवनबाट सञ्चालनमा ल्याइएको हो ।
नयाँ भवनमा सरेसँगै अस्पतालमा दैनिक ३५० देखि ४०० जनासम्म बिरामी सेवा लिन आइरहेका छन् । यसअघि दैनिक १५० देखि २०० जनामात्र बिरामी आउने गरेका थिए । बालबालिकाको उपचारका लागि मात्रै दैनिक ७० देखि ९० जना आउने गरेका छन्, जुन नारायणी उपक्षेत्रीय अस्पतालकै हाराहारी हो ।
बालरोग विशेषज्ञ डा. इस्लामुदिन अन्सारीका अनुसार सुविधा राम्रो हुँदै गएपछि वीरगञ्ज, हेटौँडा र भरतपुर धाउने अभिभावकहरू अहिले नगर अस्पतालमै आउन थालेका छन् । अस्पतालमा बालबालिकाका सबैखाले स्वास्थ्य परीक्षणदेखि भर्नासम्मको सुविधा रहेको छ । नयाँ भवनमा बालबालिकाका लागि छुट्टै व्यवस्थित वार्डको व्यवस्था गरिएको छ ।
५० वर्ष पुरानो सिमरा स्वास्थ्य चौकी र प्राथमिक स्वास्थ्य केन्द्रलाई स्तरोन्नति गर्दै उपमहानगरले २०७९ सालमा नगर अस्पताल घोषणा गरेको थियो । संघीय सरकार र उपमहानगरपालिकाको साझेदारीमा करिब १७ करोड रुपैयाँ लगानीमा २५ शय्याको अस्पताल भवन निर्माण भएको हो । नगरप्रमुख राजन पौडेलले शिक्षा र स्वास्थ्यलाई पहिलो प्राथमिकतामा राखेर अस्पताल भवन निर्माण गरी सञ्चालनमा ल्याएका हुन् ।
अस्पतालमा ओपीडीसहित हाडजोर्नी विशेषज्ञ, बालरोग विशेषज्ञ, फिजियोथेरापी, एनालाइजर प्रविधियुक्त प्रयोगशाला र फार्मेसी सेवा सञ्चालनमा छन् । हाल पाँच जना विशेषज्ञ चिकित्सक र ११ जना मेडिकल अधिकृतसहित ५५ जना स्वास्थ्यकर्मी तथा कर्मचारी कार्यरत छन् । एक वर्षदेखि हाड तथा जोर्नीसम्बन्धी शल्यक्रिया सेवा पनि दिइँदै आएको छ ।
अस्पताल प्रमुख डा. रौनियारका अनुसार नयाँ भवनमा तत्कालका लागि ओपीडी र ल्याब सेवा सुरु गरिएको छ भने बाँकी सेवा चरणबद्ध रूपमा सञ्चालन गरिनेछ । अस्पतालमै विशेषज्ञबाट शल्यक्रिया हुन थालेपछि स्थानीय नागरिकलाई उपचारका लागि वीरगञ्ज, भरतपुर र काठमाडौं धाउनुपर्ने बाध्यता कम भएको छ ।
