काठमाडौँ । भैरहवाका लागि उड्न तयार भएका श्री एयरलाइन्सका दुईवटा विमान उडान भर्नै लाग्दा प्राविधिक समस्या देखिएपछि पार्किङमा फर्काइएका छन्। मंगलबार दिउँसो दुवै विमान टेकअफ गर्ने क्रममा गडबडी देखिएपछि उडान रोकिएको हो।
विमानमा सवार ८० जना यात्रु दुईपटकसम्म उडान रोकिएपछि अलपत्र परेका छन्। यात्रुहरूलाई गन्तव्यसम्म पुर्याउन एयरलाइन्सले तेस्रो विमानको व्यवस्था गर्ने तयारी गरिरहेको छ।
के कारणले दुवै विमानमा एकैपटक समस्या देखियो भन्नेबारे अहिलेसम्म कुनै औपचारिक जानकारी आएको छैन। एयरलाइन्स र विमानस्थल दुवैले यस विषयमा औपचारिक धारणा सार्वजनिक गरेका छैनन्।
यात्रुहरूले लामो समयसम्म कुरिरहनुपर्दा उडान तालिका प्रभावित भएको छ। तेस्रो विमानको व्यवस्था भएपछि मात्र उनीहरू भैरहवातर्फ उड्न सक्नेछन्।
