काठमाडौँ । नेकपा (एमाले) का अध्यक्ष केपी शर्मा ओलीले नेपाल संवत् ११४७ को सुरुआतसँगै देशभित्र र बाहिर रहेका सबै नेपालीलाई शुभकामना दिएका छन् ।
अध्यक्ष ओलीले म्हः पूजा, गोवद्र्धन पूजा र हल तिहारका अवसरमा पनि छुट्टाछुट्टै सन्देश दिँदै यी पर्वले नेपाली समाजको मौलिक पहिचान झल्काउने बताए । उनका अनुसार तिहारसँग जोडिएका यी पर्व प्रकृतिप्रतिको प्रेम र श्रम गर्ने संस्कृतिका अनुपम उदाहरण हुन् ।
‘आज मनाइने म्हः पूजाले आत्मसम्मान र आत्मशुद्धिको सन्देश दिन्छ,’ अध्यक्ष ओलीले भने, ‘गोवद्र्धन पूजाले प्रकृति र पर्यावरणप्रतिको कृतज्ञता अभिव्यक्त गर्छ भने हल तिहारले कृषि संस्कृतिको गरिमा उजागर गर्छ ।’
उनले म्हः पूजा, गोवद्र्धन पूजा तथा हल तिहारले सबैको जीवनमा सुख, समृद्धि र सद्भाव ल्याओस् भन्ने कामना गरे । सन्देशको अन्त्यमा उनले नेवारी भाषामा ‘न्हु दँया भिन्तुना’ भन्दै नयाँ वर्षको शुभकामना दिए ।
राष्ट्रिय विभूति शङ्खधर साख्वाले विसं ९३७ (इसं ८८०) मा गरिब जनताको ऋणमोचन गरी नेपाल संवत् सुरु गराएको इतिहास छ । लिच्छविकालीन राजा राघवदेवको शासनकालमा सुरु भएको यो संवत् नेपालकै मौलिक संवत् मानिन्छ ।
