भक्तपुर । नेपाली नोटमा नेपाल संवत् अङ्कन गर्ने सरकारको प्रतिबद्धतालाई राष्ट्रिय स्वतन्त्र पार्टीका सांसद रुकेश रञ्जितले स्वागतयोग्य कदम भनेका छन् । नेपाल संवत् ११४७ को नयाँ वर्षको अवसरमा भक्तपुरमा आयोजित एक कार्यक्रममा बोल्दै उनले यस्तो धारणा राखेका हुन् ।
भक्तपुर क्षेत्र नम्बर १ बाट निर्वाचित सांसद रञ्जितले नेपाल संवत् नेपालीको मौलिक पहिचान र गौरवको प्रतीक भएको बताए । यसको प्रवद्र्धन नेपालभित्र मात्र सीमित नराखी अन्तर्राष्ट्रिय स्तरसम्म पुर्याउनुपर्ने उनको भनाइ छ । सरकारले नेपाल संवत्को प्रवद्र्धनका लागि गरिरहेका प्रयास प्रशंसनीय रहेको उनले उल्लेख गरे ।
कार्यक्रम राष्ट्रिय विभूति शंखधर साख्वाः प्रतिष्ठानले आयोजना गरेको थियो । सांसद रञ्जितले शंखधर साख्वाःको प्रतिमामा माल्यार्पण गर्दै उनको परोपकारी योगदानलाई स्मरण गरे । प्रतिमामा फूल चढाएर मात्र नपुग्ने भन्दै उनले साख्वाःको इतिहास र योगदान भावी पुस्तासम्म पुर्याउनुपर्नेमा जोड दिए ।
यसैबीच, संस्कृति, पर्यटन तथा नागरिक उड्डयन मन्त्रालयको सहकार्यमा नेपाल संवत् र संस्कृतिको संरक्षण तथा प्रवद्र्धनमा योगदान पुर्याउने व्यक्तित्वलाई एक लाख ११ हजार १११ रुपैयाँको पुरस्कार प्रदान गर्ने सरकारी प्रतिबद्धता पनि प्रशंसनीय रहेको सांसद रञ्जितले बताए ।
उनले शंखधर साख्वाः प्रतिष्ठानलाई थप सुदृढ बनाउँदै संस्कृति मन्त्रालयमा सूचीकृत गरी वार्षिक बजेटको व्यवस्था गर्नुपर्ने माग समेत गरे ।
