खजुरा (बाँके) । नौ वर्षदेखि अलपत्र परेको खजुराबजारको चारलेन सडक निर्माण सम्पन्न भएपछि बजारको मुहार फेरिएको छ।
नेपालगञ्ज–गुलरिया हुलाकी राजमार्गअन्तर्गत खजुराबजार क्षेत्रको एक हजार ८०० मिटर सडक स्तरोन्नति गरिएको हो। सडकमा १६ मिटर चौडाइको कालोपत्रे र करिब दुई मिटरको फुटपाथ बनाइएको योजना कार्यालय नेपालगञ्जका प्रमुख लीलाबहादुर भण्डारीले जानकारी दिए। सोही खण्डमा पर्ने पेडारी नालाको पुल निर्माणका लागि छुट्टै ठेक्का लगाइएको थियो।
यसअघि विसं २०७४ मा सडक डिभिजनले ठेक्का लगाएको यो सडक गजुरमुखी कन्स्ट्रक्सनले विसं २०७४ चैतदेखि निर्माण सुरु गरेको थियो। विसं २०७७ चैतसम्म सम्पन्न गर्नुपर्ने सडक गुणस्तरहीन र अधुरै छोडिएपछि यात्रुले वर्षौंसम्म सास्ती खेप्नुपरेको थियो। स्थानीयको निरन्तर विरोध र ठेकेदारको लापरबाहीपछि सडक डिभिजनले ठेक्का सम्झौता खारेज गरेको थियो।
त्यसपछि हुलाकी राजमार्ग निर्देशनालयले जिम्मा लिएर करिब सात करोड रुपैयाँको लागतमा मैटहवा–एनएटी–स्टेटलाइट जेभीमार्फत सडक निर्माण गराएको हो। नेपालगञ्ज–गुलरिया खण्डको २७ किलोमिटर सडक यसअघि नै सञ्चालनमा आइसकेको छ।
सडक बनेपछि खजुरा बजारको पहुँच बढेको गाउँपालिका अध्यक्ष डम्बर बिकले बताए।
